網頁清單

2011年6月30日 星期四

東海酒家 East Ocean Restaurant

25 June 2011, Saturday


父親節押後一星期食, 唔使同人迫, 價錢又正常, 服務都好D, 仲唔使分時段限時限刻, 真係樣樣都好D...


原本想叫魚翅鮑魚餐(全包免加一), 不過幾個細路仔又冇理由加錢加人頭, 唔抵嘛... 所以最後決定散叫...


特式併盤--鴨舌暖暖地, 幾好味... D燒排骨就普普通通冇咩特色...


蝴蝶夾伴藕餅--食完都唔記得食過, 可以不理...


蒜片和牛粒--D牛肉好好味喎, 仲好易咬開, 正...


生猛龍蝦(芝士焗)(另加2個伊麵底)--D龍蝦好多肉好新鮮, 芝士伊麵好好味, 叫咗2個都唔夠喉...


瑤柱貴妃雞(半隻)--味道都OK...


北京片皮鴨(1隻)--嘩!!! 乜呢度有1隻鴨??? 隻鴨都多肉同埋冇咩肥膏, 味道都OK...


麼麼--什麼什麼??? 我地對張上菜紙時都R晒頭, 咩麼麼呀? 我地都冇ORDER... 原來... 係包片皮鴨嘅皮... D麼麼薄到我一手夾起一塊, 原來係四塊咁多, 使唔使薄到咁呀???


香草鮮茄星班骨腩(送濃湯灼時蔬)--呢個都OK吖, 酸酸甜甜仲好香香草味, 點解會成鍋食剩晒o架??? 全晚得呢一味食剩咋喎...


蝦球荷塘滑豆腐--好滑呀D豆腐!!!!!! 味道好清淡, 好快比人掃晒...


馳名無鍚骨--好入味呀, 又夠淋, 如果份量多D就好喇...


金銀蛋浸莧菜--中規中矩...


壽包--大家都食到好飽, 所以14個人SHARE 3個超巨型大過拳頭嘅原隻鹹蛋黃壽包, 簡直係創舉!!! 明明我叫佢地ORDER 6個o架嘛... 味道當然係好味啦, 生招牌o黎o架嘛...


桂花馬蹄露(送)--好難食!!! 打D蛋花落D獻水度, 再落桂花同馬蹄... 最憎D糖水打獻...


食足3個鐘, 坐得好舒服, 同埋坐滿人都好寧靜, 屬共叙天倫之選... 


相比起以前貴夾唔飽嘅東海, 而家佢都算抵食咗同埋好味咗, D餸嘅份量都正常咗好多...


是次每人消費約$190元
味道: 3 環境: 3 服務: 3 衛生: 3 抵食: 3
###
地址 : 大角咀海輝道11號奧海城1期1樓101號舖
電話 : 2367 1135


2011年6月29日 星期三

東京マグニチュード8.0 (東京地震8.0)

28 June 2011, Tuesday

「東京地震8.0」係2009年7月於日本富士電視台的noitaminA播放, 以虛構地震為主要情節的電視動畫, 2010年11月5日於香港J2台播放...


近日J2台重播, 我睇親都喊到收唔到聲...

2011年6月28日 星期二

香麻法國忌廉可麗蛋糕@工聯會

24 June 2011, Friday


已經多年冇再放工趕去上課, 對我呢個老人家o黎講, 未免太辛苦啦~ 未上第一堂已經勁想逃學, 點解我會變成咁o架...


表面看不到問題嘅失敗制成品!!!


個CAKE未著衫前嘅照片... 有同學搽到D CREAM成呎厚, 唔知係佢貪心定佢鐘意食... 我就唔想咁肥所以搽小小就算...


去慣咗COUP KITCHEN學整蛋糕, 同工聯會相比之下, 即刻好似去開酒店HIGH TEA, 突然轉咗去東菇亭飲絲襪奶茶咁, 一下子完全適應唔到...


工聯會呢度, 廿幾人塞係一個類似茶樓嘅廚房入面, 好熱, 抖唔到氣, D冷氣仲不停滴水... 衛生程度成疑..


廿幾人得2個攪拌機, 仲要4個人一組攪一份粉, 阿SIR示範時打粉打到轟轟聲, 好似學校門口D鑽地工程咁嘈, 我係完完全全接受唔到, 佢簡直係教壞人!!!


到煎可麗餅時, 廿幾人得一個煎PAN, OH MY GOD!!!!!! 我簡直等到就o黎暈低!!!
(我係一個唔等得嘅人, 一等得耐就會悶到好眼瞓)


3小時嘅課程, 上課初時腦海有很多不滿, 到制成品接近完成時, 心理才調整成功, 感覺舒一口氣... 不過往後都一樣有機會隨時中途退學...


眼見阿SIR全程好落力, 唔係HEA教, 我都覺得唔可以將硬件嘅問題入埋佢數...


一份錢, 一份貨!!! 完成咗呢10堂嘅課程, 我都係要走番去COUP KITCHEN嘆住學整CAKE!!! COUP KITCHEN除咗一人有一份完整工具之餘, 阿SIR又夠PRO, 仲有大堆助手協助, 又有LOCKER擺手袋, 個CAKE仲鬼咁靚又好味, 環境又好, 簡直係服侍週到, 可能係咁, 將我地呢D學員寵壞咗...


註: COUP KITCHEN係包埋食物盒同環保袋, 工聯會就要自己帶食物盒同袋...


2011年6月26日 星期日

奧海城《變形金剛黑月降臨》之穿梭銀河

25 June 2011, Saturday


去到奧海城2期見到超巨型「變形金剛」模型, 有成15呎高呀!!! HONEY緊係唔放過同佢影相嘅機會啦~ 相信好多人嘅另一半都會為「變形金剛」而著迷...


「變形金剛」會係度等大家直至7月24日, 萬勿錯過!!!




活動詳情: -


奧海城《變形金剛黑月降臨》之穿梭銀河
http://www.olympiancity.com.hk/OC/cmsImages/promotionImages/13078980033.jpg


奧海城《變形金剛黑月降臨》之穿梭銀河: 銀河尋寶
http://www.olympiancity.com.hk/OC/cmsImages/promotionImages/13078980673.jpg


2011年6月25日 星期六

鐮倉和茶房夢見屋 Yumemiya

22 June 2011, Wednesday


3號風球「海馬」殺到, 返工時大風到的士門"啪"一聲開到90度, 想開遮??? 開小小已經好似就吹斷咁, 唯有冒雨跑返公司...


放工時依然橫風橫雨, 索性坐的士返屋企先搵食... 阿的士司機話"吓? 係呢度轉出去就係啦喎!", 我答"係呀!", 坐定定唔郁等開車咁款... 咁大風大雨, 唔好話轉出去, 過對面馬路都濕晒啦, 吓話...


返到吉豬島, 時間實在太早, 好飽, 食唔落... 唸o黎唸去, 決定去好耐冇食嘅「夢見屋」...


佢嘅Set Dinner有餐湯同沙律, 之但係根據以往嘅經驗, 餐湯好似胡仔咁, 沙律又唔多掂, 所以我地決定散叫再加甜品...


咖哩奄列蛋飯--咖哩似平時係超市買的即食中辛咖哩, 味道尚可...
執相時好想KEY對閃閃眼睛落D白飯度, 再KEY埋個髮簪就即時變身日式古裝小美人啦, 嘩咔咔咔~ (我的低能之道)


野菜蕃茄飯--只食到酸蕃茄味, D野菜都幾油, 仲唸住叫呢個酸酸地嘅飯可以開胃D, 結果都係冇胃口... 食唔晒果D... KEKE... 塞埋比HONEY食咪得囉...


白玉寒天甜點--甜品一向幾飽都食得落... 「寒天」係用海藻整, 食物纖維非常豐富, 口感QQ的, 配同樣QQ的白玉(湯圓), 加埋紅豆, 簡直天衣無縫!!! 食兩啖甜到漏嘅紅豆, 又飲一啖甘濃嘅抺茶, 好MATCH呀... I LIKE IT!!!

 

時間尚早, 有梳化位坐之餘, 仲唔使同迫生人迫埋一齊坐, 繁忙時間時就冇坐得咁舒服o架啦...

 

服務方面就唔好太大期望, 侍應生都係「阿夢」一族...

 

同Italian Tomato一樣, 甜品係佢地嘅強項, 其他食物就...

是次每人消費約$80元
味道: 3 環境: 3 服務: 3 衛生: 3 抵食: 3
###
地址 : 鰂魚涌康怡廣場南座吉之島2樓L202號舖
電話 : 2560 2483


2011年6月22日 星期三

大鄉里入廚 の 驚見吸血蟲 (水蛭)

19 June 2011, Sunday



 好驚呀!!! 救命呀!!! 有冇高廚救下我呢個新手呀???


頭先洗菜發現咗一團黑色嘅泥, 好似平時咁搵水沖走佢, 佢會郁o架!!!!!! 之後就係個碗盆度現身... 卷吓卷吓... 吸血蟲(水蛭)呀!!!!!!


勁驚!!!!!! 全身都覺得好痕!!!!!!


開行水喉沖佢走, 佢吸實個碗盆, 沖咗好耐先沖得走!!!


之後即刻帶番對洗碗手套, 繼續洗菜, 今次開到D水行一行... 隱隱約約好似都仲有一團差唔多嘅o野出現, 不過D水力太勁, 瞬間已經沖走咗...


請問各位高廚, 究竟...... D唐生菜... 有吸血蟲(水蛭)... 係咪好平常呢?????? 如果係, 我以後都唔敢買菜啦!!!


我而家仲驚緊呀!!!!!! 唔該幫幫手, 解答吓我呢個入廚新手...


2011年6月21日 星期二

大鄉里入廚 の 大鑊!!!!!!

18 June 2011, Saturday

女人真係好易買錯o野!!!

之前做足資料搜集, 仲去吉豬島巡視過幾次, 已經扑槌決定一等到感謝日就即刻買特福32cm不鏽鋼3層平底炒鑊... 其實當時32cm都已經嫌大, 之但係果隻最啱心水之餘, 價錢又最平...

到咗18號, 吉豬島忽然感謝日, LaLa聲跑去吉豬島, 又見到Buffalo特賣場... 走咗入去... 發現咗呢個不鏽鋼5層平底炒鑊... 原價嘅3分1價錢, 吉豬島再有9折, 仲送不鏽鋼清潔劑... 只係貴特福少少, 太太太抵啦!!! 迷迷糊糊就買咗...

2011年6月20日 星期一

樂壽新漁村酒家 Lok Sau Restaurant

14 June 2011, Tuesday



同力仔嘆完半島High Tea, 就去佐敦幫早兄賀大壽!!!


早兄搵咗間順德菜... 咦... 順德菜... 我好似未食過喎...


餐廳內得3排枱, 小菜館格局... 一坐低就聞到隔離枱D煲仔菜超超超香!!! 忍唔住勁昅... 之後問侍應生隔離枱食咩, 佢就話係薑蔥焗魚... 雖然我唔多食魚, 之但係真係好香, 所以都決定試吓...


我地D煲仔菜一到, 隔離枱啱啱坐低, 聞到好香, 又好似我地咁, 議論紛紛, 哈哈, 好似一枱Sell一枱咁, 循環不息, 感覺好攪笑...


瓦罉煎焗魚咀--好好好香呀!!! 我地第一時間係夾D薑蔥o黎食囉, 之後先食魚... 我食咗面珠登, 滑到夾唔起, 味道都OK喎, 一D都唔腥, 好掂呀!!!


薑蔥桶蠔煲--又係好好好香呀!!! D蠔仲好巨型, 我冒病食咗一隻, 好Juicy呀, 啖啖肉, 又香又惹味, Ichiban呀!!! 重點係, 我唔鐘意食蠔都覺得佢好食!!! 問過專業人士, 煮完都咁大隻咁Juicy, 應該係美國桶蠔!!!


漁村肥仔雞--冇得傾, 情意結嘅關係, 呢味係我地心目中係最好味嘅!!! 因為細時都係咁樣食雞, 好有懷舊Feel... 冬菜, 紅蔥頭, 紅棗, 杞子, 簡簡單單, 味道極之豐富!!! 讚! 讚!! 讚!!!


啫啫通菜煲--都係香+香+香!!! 味道都係濃淡適中, 掂呀!!!


大良炒鮮奶--全餐最唔掂!!! 一D奶味都冇, 又炒到老晒, 一D都唔滑溜, 好失望!!!
仼我地原本係叫咗勒流欖角骨, 之後醒起D網民推介呢個大良炒鮮奶, 急忙搵侍應生幫手叫停個欖角骨, 轉做炒鮮奶, 真係錯得緊要...


大哥炒飯--好鹹呀!!! 好好好辣呀!!! 我地估計係D胡椒作怪, 應該係D海鮮唔新鮮, 所以要落好多胡椒辟味!!! 都唔明點解D網民會推介, 食白飯好過...


後面張大枱有成十個人以上, 超超超嘈!!! 全部人都大聲公上身!!! 嘈到我地耳膜都穿, 莫講話想吹吓水...


全餐整體都幾滿意, 因為碟雞真係好啱口味!!! 為咗再嚐肥仔雞, 我一定會再o黎!!!


是次每人消費約$150元
味道: 4 環境: 3 服務: 3 衛生: 4 抵食: 5
###
地址 : 佐敦德成街1-5號地下
電話 : 2736 7728


2011年6月19日 星期日

半島酒店大堂茶座 The Lobby

14 June 2011, Tuesday



多年前已經對半島酒店嘅High Tea好有興趣, 只可惜一直搵唔到腳夾啱時間一齊去, 直至今日, 終於可以同都係未去過嘅力仔一齊去一嚐佢嘅滋味...


金碧輝煌嘅Lobby... 配合Live Band演奏古典音樂, 好浪漫呀!!! 


唔好以為咁貴嘅下午茶, 仲要係閒日, 可以唔使排隊直入... 如果你咁諗就大錯特錯啦!!! 我地3點半去到, 都排咗半個鐘先有位坐...
(明明打電話去問都話冇得Book位, 都唔明點解有網民話自己Book咗位)


仲有千祈咪著拖鞋去呀, 佢真係有職員巡邏o架!!! 一見到有排緊隊嘅客著住拖鞋, 就會用英文問個客有冇Another Shoes... 冇就緊係冇得入啦~


主角出場啦... 半島下午茶(兩位) The Peninsula's Classic Afternoon Tea For two persons!!!


(頂層) 精製法式雜餅 Home-made Afternoon Tea Pastries
(中層) 雜錦手指三文治, 鹹脆酥餅 Assorted Finger Sandwiches and Savoury Pastries
(底層) 英式烘提子鬆餅配奶油忌廉及紅草莓果醬 Freshly Baked Raisins Scones, Devonshire clotted cream and Strawberry preserve


左一嘅Chocolate Tart最好味!!! 好有驚喜!!! 香脆嘅朱古力外殼, 包住微酸嘅果醬, 配軟滑無比嘅香濃朱古力慕士, 好正呀!!! 
左二嘅Chiffon Cake戚風蛋糕係我平時最憎食嘅, 不過佢都好味過出面果D好多...
中間嘅Rraspberry Tart紅莓撻唔食得, 所以唔知咩味...
左後方嘅White Chocolate Apricot Cake白朱古力杏脯蛋糕滲透出淡淡嘅奶味, 杏脯青香, 配紅茶最Match...


我第一啖就食右下角嘅鹹點, 竟然係... Mushroom Pie?!! 天呀!!! 唔係咁大整蠱呀嘛!!! 好彩我扮晒淑女, 只係咬咗一小啖, 唔係成舊放入口啫!!! 雖然只係一小口, 但係D餡超有菇味, 好菇嘅朋友一定鐘意!!!
右二嘅三文治, 由於腸胃不適, 有生菜, 唔可以食...
左二嘅三文治, 煙三文魚都OK, 冇咩特別...
左一嘅蛋批, 好重蛋味, OK啦, 都係冇驚喜...
右後方嘅Ham Panini個樣唔得, 反而味道係中層之中最好嘅, 個包好軟熟, 火腿好好味!!!


鬆餅好鬆呀!!!!!! 唔係講笑, 真係我人生中食過最鬆嘅鬆餅!!! 除咗鬆之外, 仲唔會乾到張住個口要即刻飲水果種, 配埋奶油忌廉同紅草莓果醬, 好好味呀!!!


荔枝紅茶--好濃郁嘅紅茶味, 不過冇荔枝味, 最奇係... 點解冇茶隔嘅??? 咁高級嘅傳統英式餐廳, 竟然冇茶隔???
Iced Cappucino--味道OK... 咖啡有咖啡味, 影射
DG Cafe, 哈哈哈...


Panna Cotta--食到尾聲, 侍應生會奉上凍嘅Panna Cotta, 奶凍好滑, 奶味香濃, 配杏脯醬加埋開心果碎, 味道好夾, 連唔鐘意食奶凍嘅我都覺得好好味!!!


Macaroons--埋單時侍應生會奉上Macaroons, 我食咗朱古力味, 嗯... 好香呀, 好重朱古力味但又唔會過甜, 仲好鬆脆, 一定係新鮮貨色, 好味過我自己整果D好多!!! 呵呵...


鬆餅的確係好好好味, 不過再好味都食唔落, 唯有打包2個走, 返屋企再嘆過...


演奏古典音樂嘅Live Band居高臨下...


整體食物好有水準, 環境更加冇得彈, 唯一係可能太爆滿, 服務員嘅服務並不貼心, 好幾次都要不斷揮手幾分鐘甚至十幾分鐘先有服務員見到...


當年獅子星號打鑼打鼓進軍香港, 最記得佢句口號--「一生總要豪一次」!!! 我今日... 豪咗啦, 好Hyper呀, 嘩咔咔咔!!!


是次每人消費約$275元
味道: 5 環境: 5 服務: 4 衛生: 5 抵食: 3
###
地址 : 尖沙咀彌敦道19-21號半島酒店大堂
電話 : 2920 2888


2011年6月15日 星期三

Caffe Vergnano 1882

13 June 2011, Monday



今晚一眾好友為KaKaMa賀壽, 我大鄉里出城, 第一次o黎到The ONE, 仲要睇地圖先識行, 玩下手D遊客仲熟路過我, 嘩咔咔咔咔...


個商場D冷氣好凍呀, 想凍死人咩... 原來而家UG唔係o係Underground, 而係o係G樓上... 咁奇怪嘅...


餐廳裡面... 呀... 唔係... 應該話Cafe裡面, 3面落地玻璃, 面向九龍公園, 個景都幾開揚... 只可惜D枱櫈, 係方型矮木枱, 梳化都OK好坐, 但係矮咕o臣就麻麻地啦, 同埋張枱太細, 叫多幾樣o野都擺唔到, 根本完全唔適合食晚餐, 只適合飲下o野睇下書Hea時間果亭... 仲有D梳化同後面枱背貼背, 好迫夾, 完全冇High Class格局, 衰過Starbucks同Pacific Coffee...


Insalata Di Capesante Isolane 煎帶子伴小馬鈴薯配紅酒醋汁沙律--個名勁長... 煎帶子都幾新鮮, 入口有彈性, 其他我冇食, 要由好友們留言補充...


Timpano Alla Linguine 香辣雞肉扁意粉--好友們話好辣, 叫我唔好食, 因為我腸胃唔多妥... 好啦, 聽你地話啦, 唔該幫我留言補充...


Crespelle Alla Romana 白汁菠菜芝士煎餅--好多菠菜係入面, 用千層麵夾住, 白汁都好Rich, OK喎...


Salamino Piccante 意式香辣腸蕃茄汁薄餅--腸冇辣味, 薄餅冇茄汁味, 唯一可讚係, 佢係我鐘意果款真係薄嘅薄餅...


Dello Chef 廚師精選薄餅 (火腿, 水牛芝士, 蕃茄, 火箭菜)--腸胃不適, 要了走D火箭菜先可以食個Pizza... Prama ham 都OK鹹香, mozzarella cheese切得太細粒, 唔係好食得出咩味, 火箭菜要靠好友們幫手補充... 奇喇... 又係冇蕃茄味??? 呢間野D蕃茄好珍貴嘅咩??? 落咗等於冇落???


Crostata Al Limone 檸檬撻--好友們話好酸, 我又覺得OK啱啱好喎... 賣相稱得上係精美...


Frutto Della Passione--呢個真係全餐至好味喎, 熱情果蓉味道啱啱好, 甜而不膩, 好清新, 賣相就更加唔使講啦... 靚呀...


Cassata 牛油蛋糕雪糕三文治--個樣... 我唔Buy囉... 雪糕有雲妮拿, 朱古力同士多啤梨, 好友們有D話士多啤梨雪糕酸, 有D又話士多啤梨雪糕好食, 真係個個人嘅口味都唔同... 牛油蛋糕就真係幾好食, 不過食完會好滯囉...


Tiramisu--個賣相OK啦, 有大大個1882 Logo係面... 味道都夠濃, 口感都幾creamy, 唔錯...
Creamino--有個雪糕球浸係咖啡入面, 好友們細細聲話... Starbucks好飲D...


仲有連相都唔想影嘅香蕉咖啡!!! 鑽媽話個樣成杯麥當當咖啡咁, 咁大家就知有幾唔得啦...


整體o黎講, 佢D甜品係最得嘅, 晚餐就真係好壞參半... 建議大家可以搵個黃昏帶埋本書o黎嘆吓佢D甜品, 感覺應該會唔錯...


是次每人消費約$159元
味道: 3 環境: 3 服務: 3 衛生: 3 抵食: 2
###
地址 : 尖沙咀彌敦道100號The ONE UG221號舖 
電話 : 2907-3817