網頁清單

2011年5月29日 星期日

DG Cafe and Wine Cusine

26 May 2011, Thursday


力仔有DG Cafe嘅下午茶「Buy 1 Get 1 Free」Coupon, 所以我地專程走去Heritage 1881食High Tea... 順道練習吓點樣用部單鏡機...


坐低之後先發現... 點解... 個餐牌嘅下午茶餐... 竟然得一千零一個??? 仲要係「Deluxe Afternoon Tea Set」For Two??? For Two... 即係2人餐??? 咁點買一送一呀???


最後... 竟然係買一個2人餐, 送一個2人餐!!! 唔係呀嘛... 我地得2個人, 點食2個2人餐呀???


之但係... 如果只係食1個2人餐都係收咁多錢, 我地咪好蝕!!!


最後... 唔想蝕比佢!!! 我同力仔兩個人要合力幹掉果2個2人餐!!! 真係飽到夜晚都唔使食晚飯...


Iced Mocha--嘩!!!!!! 冇咖啡味嘅??? 好似用1份Starbuck Iced Mocha加99份水咁... 最後只飲咗3份1... 唔係我地折墮, 我地已經好盡力, 冇咖啡味嘅咖啡真係好難啃... 好彩仲有第2杯餐茶(4人餐嘛)...


2份「Deluxe Afternoon Tea Set」For Two... 好嚇人嘅陣容!!!


我加1隻廋Monkey, 要幹掉呢壇o野, 坐係隔離左右嘅食客個個睇到眼突突+O晒咀!!!


未知份量時, 侍應叫我地食一客Pack走一客, 我叫佢拎一客出o黎睇吓份量有幾大先... 捧咗一Set出o黎之後, 我地即時話"咁小??? 點會食唔晒呀??? 平時去食Buffet, 未計頭盤熱葷, 剩係甜品都食到3碟啦!!!"... 哈哈哈哈... 好大嘅口氣!!!


(上層)
煙三文魚三文治--好似千島醬搽麵包咁... 薄薄嘅一層醬, 顯得麵包好乾身...
迷你漢堡--有牛肉及雞肉, 2個都整得幾Juicy, 味道OK...
煙肉洋蔥蛋餅--冇咩味... 平時好小食, 唔知正常嘅係咪冇味...
魚子醬多士--睇完華麗明星賽, 我識分咩叫好嘅魚子醬啦... 剩係睇Size都知佢唔掂啦... 仲要得個鹹字, 冇餘韻... 好食家口吻呀!!! 嘩咔咔咔...
意大利火腿卷--OK喎呢個... 係全個餐中比較夠味嘅一款...


(下層)
紅莓鬆餅--未食... 太飽要包走...
迷你蘋果撻--我一向都唔多食蘋果撻... 但係佢蘋果同肉桂味都唔夠, 蘋果撻迷應該唔收貨...
迷你鮮果撻--哈密瓜冇味... 其他都係一般...
迷你布朗尼--冇咩朱古力味, 都幾乾身, 同我食過嘅好大出入...
甜絲絲三重奏--Creme Brule比較OK, 朱古力毛士都一般OK, 我同力仔都唔願意食士多啤梨毛士, 又會咁夾嘅...


Peach Tea--食到好飽, 再飲多一杯餐飲... 標準茶包, 冇問題...


嘆完茶就要開始攝影練習o架啦~


如果冇Coupon, 正價要$268 For Two再加一的話, 真係極之極之唔好預我... 因為... 冇一樣食物能夠使到我地一放入口就瞳孔放大...


Service可以話比某D茶餐廳更差... 叫個女侍應拎Drink List, 佢On The Way都渺晒嘴, 埋到o黎係背向我地隊個Drink List埋o黎講"你自己睇!!!"... 我知你係80後, 唔代表我地要受你氣o架!!!


食完晒o野, 上第2次餐茶果時, 成枱碟都唔收, 擺到冇晒位, 佢依然當睇唔到, 照走咗去, 當時佢冇野做o架喎, 全間餐廳唔夠5枱客, 有成4個侍應, 唔通佢係拎28蚊最低工資, 只係包佢企係度, 唔包佢收碟同拎餐牌嘅???


我影杯咖啡果時, 佢仲要長時間企係杯咖啡後面望實我... 小姐... 你唔行開, 我點按快門呀??? 我唔想D相有你個樣囉...


是次每人消費約$160元
味道: 3 環境: 4 服務: 1 衛生: 3 抵食: 1
###
地址 : 尖沙咀廣東道2A 1881, 2樓208號舖
電話 : 2604 1881


2011年5月28日 星期六

王家沙 Wang Jia Sha

25 May 2011, Wednesday


晏咗食Lunch, 搞到夜晚冇胃口... 去王家沙飯堂叫D小吃當晚餐...


香芹伴雞絲--好辣呀... 不過又好幾香喎... 夏天冇胃口食辣野最啱...


紅油炒手--又係辣野, 搵命博, 哈哈...


乾扁四季豆--四季豆配埋肉鬆一齊食好好味, 略為鹹咗小小...


高力豆沙--好小豆沙, 同埋唔夠鬆化...


舊同事之前都話王家沙唔好食, 之但係帶咗佢o黎呢間分店, 佢又讚不絕口... 所以... 我估就算係同一集團, 都要睇唔同分店個廚嘅功力... 慶幸太古分店味道仍然OK, 等我同HONEY可以多一間飯堂食飯...


尋晚6點半都仲有卡位坐, 坐得好舒服... 如果坐圓枱都OK... 最憎坐長方枱同隔離貼住坐, 仲要張枱細到只可以放一碗麵...


是次每人消費約$105元
味道: 3 環境: 3 服務: 3 衛生: 3 抵食: 3
###
地址 : 太古太古城道18號太古城中心1 樓101號舖
電話 : 2560 3668


2011年5月27日 星期五

彩雲軒 Chou Wan Hin Seafood Restaurant

25 May 2011, Wednesday


今日多野做, 過晒Lunch Hour先有得食飯... 走咗去彩雲軒飲特價下午茶...


叉燒焗餐包--個皮甜甜地小小脆, OK喎...


鮑汁鳳爪--淋就好淋架喇, 係個汁唔夠濃味囉...


迷你乾炒牛河--OK喎, 好夠熱喎... 不過好似冇咩牛肉咁...


香滑豆腐花--一D都唔滑...
彩虹鬆化蛋散--淋淋地冇咩蛋味...


平時都係去開飲特價早茶, 午市就貴一倍兼又嘈又等位等得耐, 所以大家咩時段去就自己決定啦...


是次每人消費約$44元
味道: 3 環境: 3 服務: 2 衛生: 2 抵食: 3
###
地址 : 鰂魚涌英皇道979號太古坊德宏大廈2樓
電話 : 2590 9398


2011年5月26日 星期四

華昌粥麵燒腊飯店 Wah Cheong Noodle Restaurant

23 May 2011, Monday


Lunch食咗麥當勞(又換多1隻麥當勞「可口可樂罐形玻璃杯」), 好滯呀!!! 放工冇咩胃口, 路過剛裝修完嘅華昌粥麵, 入去食碗麵當晚餐...


牛筋腩雲吞瀨粉--美味不再!!! 雲吞好硬, 冇鮮蝦味... 牛筋冇以前咁好味, 但仍然OK... 牛腩好失望, 真正嘅牛腩只得1cm * 1cm * 0.5cm咁大, 而大大舊果舊, 口感完全係煲完湯嘅廋肉...


海南雞飯--同裝修前無明顯分別, 已經去骨, 食得好盡興, 3隻醬(豉油, 甜酸醬, 蔥油)都各領風騷, 好快就會點晒, 雞油飯好香, 例湯比裝修前更味精...


曾幾何時, 一星期食幾餐華昌, 愛死佢嘅鮮蝦雲吞, D蝦又鮮又甜又大隻... 可惜... 一切已成過去... 不復再... (本人未食過華昌雲吞之前, 勁HATE食雲吞)


裝修後, 份量明顯小咗, 價錢明顯貴咗, 座位明顯窄咗... 唯一可取嘅係, 食物多完化咗, 而家多咗小菜同炒粉麵, 不過, 呢個可能會成為令佢食物質數下降嘅致命傷, 因為廚房要處理嘅材料多咗, 就會冇咗之前剩係整幾款粥麵嘅專注力...


是次每人消費約$55元
味道: 3 環境: 3 服務: 2 衛生: 3 抵食: 2
###
地址 : 太古太古城道26號漢宮閣地下
電話 : 2568 6744


2011年5月25日 星期三

那霸沖繩料理 Naha

22 May 2011, Sunday


是日紅雨, 搵食唔去得遠, 最後決定去番半年前發現嘅新飯堂... 那霸!!!


午餐有接近20款選擇, 緊有一款啱你心水!!!


午餐沙律及前菜--苦瓜蕃茄沙律好新鮮, 一D苦味都冇, 配埋沙律醬好好味... 凍豆腐好有豆味...


涼瓜炒豬肉--每次都要食呢一味!!! 涼瓜完全唔苦, 配埋豬肉同豆腐同蛋醬, 仲覺得甜添呀...


香蔥牛肉卷--天氣太熱, 標晒汗, 所以唔叫必吃嘅牛肉豆腐鍋啦... 今日試下叫香蔥牛肉卷, 都好好味喎, D蔥炒得好香呀, 配埋薄牛肉, 好好味呀... 仲要配菜係沙律, 正...


服務很好, 每次奉上餐飲前都會抺枱, 而且女服務員連我地次次都係飲熱柚子蜜都記得, 利害!!! 環境都好寧靜, 坐得好舒服... 食物亦好足料... 拉姑誠意推介!!!


是次每人消費約$100元
味道: 4 環境: 4 服務: 4 衛生: 4 抵食: 3
###
地址 : 太古太古城第10期耀星閣地下G1015號店
電話 : 2186 6969


2011年5月24日 星期二

超可愛「愛香港」抺手布

20 May 2011, Friday


收到JUSCO嘅宣傳單張, 等我昅吓有咩筍o野先... 咦... 呢SET「愛香港」抺手布好鬼得意呀!!! 20蚊2條, 感謝日仲有95折, 第一時間衝去掃一SET!!!


Love HK Project「愛香港」抺手布一套有四款, 包括「餐蛋麵」,「 咖喱魚蛋」, 「煲仔飯」, 「叉燒包」, 卡娃兒呢!!!


2011年5月23日 星期一

桃李 Toh Lee

21 May 2011, Saturday


平時成日聽Honey講日航酒店間中菜有幾咁好食, 聽咗幾年, 今日終於有我份啦~


今日同奶奶補祝母親節, 叫多D好o野食先...


飄香荷葉飯--味道幾好!!! 不過仍然覺得福臨門係最好味嘅...


香煎蝦籽瑤柱蘿蔔糕--最好味, 好香!!! 個樣成個厚多士咁, 好得意...


桃李晶瑩鮮蝦餃--唔知好唔好食呢...


蟹皇蒸燒賣--大大粒, 好味!!!


香滑流沙麻蓉包--麻蓉夠香唔太甜, 好味呀!!!


南瓜奶皇馬拉卷--佢地話冇咩南瓜味...


蠔皇叉燒包--叉燒好足料, 正!!!


客家鹹茶粿--點解鹹茶粿會甜甜地? 又鹹又甜... 不過又夾喎!!!


金網煎鍋貼--個網煎得好靚好脆, D鍋貼Lay咗係個金網下面, Honey話都幾好味!!!


鮑魚雞絲蒸腸粉--奶奶話D鮑魚麻麻地...


環境寧靜, 枱與枱之間有一定距離, 落地玻璃+全海景, 配埋柔和嘅陽光, 身心自然舒暢!!!


我第一次到桃李, 感覺良好, 以後可以多D o黎...


是次每人消費約$98元
味道: 4 環境: 4 服務: 4 衛生: 4 抵食: 4
###
地址 : 尖沙咀麼地道72號香港日航酒店2樓
電話 : 2313 4225


2011年5月22日 星期日

麥當勞「可口可樂罐形玻璃杯」

21 May 2011, Saturday


尋日睇報紙見到呢個麥當勞「可口可樂罐形玻璃杯」, 驚為天人, 一見傾心!!!


平時唔好鐘意食麥當勞, 但係今日都要第一時間衝去麥當勞買番個加大套餐!!!


紫色真係好靚呀!!! 我仲想換粉紅色同綠色呀!!!!!!


詳情可瀏覽 http://www.mcdonalds.com.hk/chinese/campaign/cokeglass/index.htm


麥當勞-食加大套餐送「可口可樂罐形玻璃杯」



麥當勞將與可口可樂首度在香港推出一套6款造型經典的「可口可樂罐形玻璃杯」。
由2011年5月21日起,於麥當勞以正價惠顧超值套餐 (早上11時後供應) 加 $3.5 轉配大薯條及大汽水,即可免費獲贈「可口可樂罐形玻璃杯」一隻,而六款顏色將會分三個星期輪流推出市面。若想率先擁有全套「可口可樂罐形玻璃杯」,則可購買任何可口可樂產品(包括套餐內之可口可樂產品),便可以每套 $120 (原價 $261,慳足 $141)購買「可口可樂罐形玻璃杯」收藏版套裝。

第一周:5月21日-27日有「炭灰色」同「紫色」「可口可樂罐形玻璃杯」贈送
第二周:5月28日起有「青檸色」同「粉紅色」「可口可樂罐形玻璃杯」贈送
第三周:6月04日起有「藍色」同「綠色」「可口可樂罐形玻璃杯」贈送


2011年5月21日 星期六

阿詩瑪雲南風味軒 Ashima Yunnan Restaurant (II)

18 May 2011, Wednesday


好耐冇去阿詩瑪食雲南o野啦... 曾幾何時, 我同Honey個個禮拜都會去食, 可能食得多食嫌咗, 又或者係唔鐘意佢裝修後嘅食物同服務同環境...


呢幾日天氣好悶熱, 冇咩胃口, Honey提議去阿詩瑪食酸辣米線...


時間尚早, 仲有卡位, 正!!!


前菜青瓜好好味, 花生都好味...


唔想諗, Order咗二人餐...


烤夫拼茄子--好好味呀D茄子, 不過醋落得過多, 太酸, 如果落小D醋就Perfect喇... 烤夫都好味...


山珍氣鍋雞--OK吖...


櫻桃椒爆花枝片--點解我見唔到有類似櫻桃椒嘅物體... 反而覺得係XO醬炒咁嘅... 花枝片都好新鮮... 唔知綠色一片片嘅係咩o黎...


糖醋里脊--好味喎, 似咕嚕肉, 但真係啖啖肉, 唔係一味得骨同粉, 正!!!


酸辣雜醬米線--必吃Item... 好味...


套餐甜品--有涼粉同玫瑰湯圓揀... 涼粉口感似蒟蒻, 佢落咗D糖漿, 甜甜地, 幾好味... 玫瑰湯圓有酒味, 清清地, 都OK...


坦白講, 服務就唔好Expect啦, 我地食完好耐, 清晒枱, 等人問我地要咩甜品, 等咗好耐都冇人問, 要自己主動問, 餐廳當時又唔係多人... 經理長期同一個客打牙骹, 打咗半粒鐘都有... 其他侍應都好似中學生咁, 完全Feel唔到佢地有工作經驗...


是次每人消費約$150元
味道: 4 環境: 4 服務: 3 衛生: 4 抵食: 3
###
地址 : 太古太古城道18號太古城中心地下005-006號舖
電話 : 2560 9666


2011年5月20日 星期五

香草煎羊扒

17 May 2011, Tuesday

以前去開吉豬島見親D醃好晒嘅羊扒都好有衝動想買o黎整下, 可惜零入廚經驗每每令我卻步, 日本311地震震傻咗我之後, 開始學人玩煮飯仔, 今日竟然膽粗粗買咗兩塊羊扒番屋企, 仲要係未醃嘅?!! (今日冇醃好果D)

返到屋企先開始知驚... 拿拿聲上網搵食譜... 咦... D BLOG友話煎羊扒只要塊羊扒新鮮就點整都好食... 真唔真呀...

2011年5月19日 星期四

鍾菜 Chung's Cuisine

15 May 2011, Sunday

今朝一早去排隊報名興趣班, 排足2個鐘以上, 好辛苦呀!!!

原本我諗住好快攪掂, 可以去鍾菜拎定籌等HONEY慢慢係屋企落o黎, 結果攪到佢要去拎籌先... 等10個Number都等咗接近1粒鐘, 中間仲要好多人唔知走咗去邊, 我地先可以咁快入座...

2個人都比咁大張梳化位, 仲要係海濱公園景+海景, 仲要免加一免茶芥, 唔怪得要係外面排咁耐啦...



脆皮叉燒包--好好味呀!!! 個皮似我至愛嘅合桃酥... 入面D叉燒餡就好似小咗D...



高湯XX角--好油淋淋, 食一件已經頂唔順...



XO醬炒年糕--好辣呀, 不過好好味...



奶皇馬拉卷--OK啦...



珍珠雞--用錫紙包住, 好辣手呀... 唔知點解好飽, 所以原封不動帶番屋企做晚餐...



食咗1個鐘埋單, 阿姐話好小人飲茶咁快手... 吓... 出面好多人排緊隊喎, 食飽仲唔走有咩好做呀...

又好坐, 又抵食, D點心又有特色, 下星期要早D黎搵位先得啦...

是次每人消費約$65元
味道: 4 環境: 4 服務: 4 衛生: 4 抵食: 4
###
地址 : 太古太古城道18號太古城中心三期1樓
電話 : 3691 9818


2011年5月18日 星期三

樂農 Happy Veggies (II)

11 May 2011, Wednesday

是夜一眾好友為五月之星舉辦壽宴, 壽星揀咗之前五塵俠試完菜後大讚嘅樂農...

雙併--有苦瓜同雪耳黑木耳, 苦瓜都好重苦瓜味, 攪到人人怕怕, 最後落晒我個肚... 呵呵...


咕嚕竹--上次食完之後大讚, 今餐又點小得...


順德炒飯--好香咖哩味, 食完一碗忍唔住再添多一碗...


蒸餃--都唔記得佢地叫咗咩餃, 張單就咁寫蒸餃...


梅菜茄子山水有機豆腐--好滑喎D豆腐, 同茄子都好夾, 好味...


煎餃--梅菜餃上次食完成日心思思想再食, 好味...


素春卷--我一向唔鐘意食春卷, 所以No Comment...


炒貴刁--都唔記得有呢碟炒野, 當時有冇食過呢... 都冇晒記憶...


香煎芋蓉餅--由細到大食親齋都一定會食芋蓉魚, 好小會唔好食...


湯餃--蕃茄薯仔餃, 依然美味...


香辣粉皮--超超超超超辣呀!!! 我聽見佢地話勁辣, 我都已經好穩陣, 夾咗1條放入口, 冇錯, 係1條... 辣到要即刻飲水, 唔止辣, 仲要麻, 好恐怖呀!!! 最後食剩大半碟...


生煎蓮藕餅--唔覺有蓮藕, 感覺都係一塊煎麵粉...


寫BLOG時執相先驚覺... 嘩... 咁多碟嘅... 究竟佢地叫咗幾多個餸??? 細數之下, 原來有成13樣野, 超誇張!!!

唔知係咪我地雞啄唔斷, 坐得太耐, 所以今次冇甜品送...

FairTrade產品--買咗最後一盒有機Jasmine Tea, 呵呵... 仲買咗上次試過幾好味嘅朱古力曲奇同薑曲奇... 仲買埋龍媽極極極力推介嘅腰果糖... 買Product嘅錢仲多過食飯錢, 利害...


是次每人消費約$115元
味道: 3 環境: 3 服務:3 衛生: 3 抵食: 5
###
地址 : 灣仔軒尼詩道99號彰顯大廈1樓
電話 : 2529 3338