網頁清單

2011年2月28日 星期一

錦田一日遊 の 紅磚屋市集


26 February 2011, Saturday


錦田一日遊嘅第2個重頭戲--紅磚屋市集!!! 非一般跳蚤市場 (全天候開放) !!!


由有機士多啤梨園過去紅磚屋市集, 車程大約3分鐘 (我致電細佬求救時, 佢誇張到話"咪10秒車程")... 不過鑽爸就唔知兜咗佢架開蓬BENZ跑去邊樹, 我一路叫住佢開慢D, 佢都好似聽唔入耳, 激死!!! 點解要我坐佢架車!!! 行行下竟然見到路牌寫住大江埔, 仲見到石崗直昇機場... 過晒籠啦!!!!!!


最後我要致電細佬求救, 係迴旋處U TURN返錦田市中心... 不過搵唔到入口, 唯有轉入錦上路, 終於搵到入口啦!!!


原來鑽爸佢地係去過o架, 攪錯呀, 要搵個未去過嘅o黎帶路... 雖然... 我係o係錦上路大嘅, 不過而家起咗西鐵, D路同建築物都變咗8-9成, 好難認o架啦...


3:30PM 到達錦田紅磚屋市集


入面有各式各樣嘅攤檔, 感覺上藝術味道比跳蚤市場濃厚好多... 鑽媽同DD都好似係度買咗D心頭好...





係時候食番個下午茶先...


原先大家妄想去紅磚屋High Tea... 點知Tea就係Tea啦, 不過冇High份... 後尾睇番個建議行程... 又真係冇個High字o架喎, 哈哈哈~


台灣烤腸仔(好油)+店主自家制五花茶+夏枯草(小甜)...


我地買o野食時, 聽到鑽爸同店主講價(好似冇5毫子係身, 叫店主收順D, 哈哈)... 最好奇唔係講價果PART, 而係佢點解可以買到佰幾蚊o野食咁多, 好想知佢買咗D咩... 皆因佢地係勁細食嘅人, 1份早餐一家三口SHARE食o架咋喎... 所以貓兄話要同佢地個「過佰元下午茶」合照...


估唔到連鑽妹都有收穫... 有個店主姐姐比佢嘅殺死人笑容冧到暈, 竟然送咗條花花頭巾比佢!!! 你睇, 佢笑得幾開心, 笑到見牙唔見眼!!! (阿BOO都有份o架, 不過條頭巾太細, 唔啱帶, 唯有還比店主姐姐)


~ 有用小資料 ~


錦田紅磚屋 Kam Tin Red Brick House


地址: 新界元朗錦田祠堂村地段 390 至 400
電話: 2482 2188
網址: http://www.yl.hk/rbh/


2011年2月27日 星期日

錦田一日遊 の 有機士多啤梨園


26 February 2011, Saturday


今日貓兄搞咗個錦田一日遊, 行程包括1) 有機士多啤梨園; 2) 紅磚屋市集; 3) 跳蚤市場!!! 行程超豐富, 同埋每個景點之間都係5分鐘車程以內, 無需四圍滕!!!


11:00AM 元朗西鐵站食早/午餐+等齊人坐TAXI!!! 如果大家唔需要呢PART, 大可以係錦上路西鐵站出, 有小巴, 又有TAXI!!!


12:30AM 到達錦田鄉村俱樂部



步行十分鐘左右, 就會見到呢位好失敗嘅「有機士多啤梨園」代言人... 哈哈... 因為BOO見到佢好驚, 唔肯行埋去影相...


每一塊田都有列明品種及價錢...


好, 貓兄, DD, 何超, BOO... 我地開始士多啤梨追捕行動!!!


好紅嘅士多啤梨... 好靚呀!!!


一家四口!!!


OK大粒+好紅嘅士多啤梨... 好靚呀!!!


好熱呀... 今日個太陽伯伯出盡力... 大家記得帶帽去...


我今日嘅收穫!!! 鑽鑽幫我影o架張相, 係咪好得呢...


「有機士多啤梨園」有法國種(60蚊1磅)同日本種(90蚊1磅),  我揀咗日本種o黎摘, 摘咗110蚊, 即係大約1.2磅!!! 即晚食晒, 都幾清甜o架, 香味仲爆燈添呀!!!


D收穫足足有2大盒, 我自備咗食物盒, 同埋平時買豐水梨留起嘅發泡膠軟墊, DD話我呢2盒直情好似係超市買嘅咁呀!!! 哈哈~


其實原本唔係咁細粒o架, 大粒嘅一早都比BOO據為己有, 中SIZE嘅亦都比後來加入嘅鑽鑽據為己有... 不過冇計啦, D小朋友咁開心, 大家都係享受個過程啫, 大粒定細粒都唔係咁緊要嘅...


原來仲有蕃茄摘, 都係跟磅數計, 剪幾多就比幾多錢... 不過好多都青BB, 所以冇摘到...


仲有太陽花, 不過好多都死晒, 得番1支大, 1支細, 呢支係細種...


鑽鑽同BOO下星期一生日, 一班姨姨幫佢地準備咗生日蛋糕!!!
「有機士多啤梨園」門口有通告, 外來食物&飲品一律唔可以帶入園內!!!
不過職員好好人, 容許我地係入面切蛋糕, 叫我地去隱蔽D嘅枱度切, 真係唔該晒!!!


~ 有用小資料 ~


有機士多啤梨自摘園


地址: 新界 錦田 水頭村 DD109 LOT668 ( 錦田鄉村俱樂部側)
電話: 5132 5131
網址: http://www.yl.hk/ktsb/


2011年2月21日 星期一

西苑酒家 West Villa


18 February 2011, Thursday (年十六)


尋晚食咗餐好難食嘅晚餐(鏞記酒家 Yung Kee Restaurant), 今晚要食好D先得啦!!!


西苑... 永遠都係我地心目中嘅米芝蓮食肆!!!


是日靚湯(蘋果豬月展湯)--YUMMY!!! 簡簡單單, 只要有HEART, 咩菜餚都可以好好味...


燒鵝下庄--肉淋, 皮小小脆, 最重要嘅係... 暖暖地!!! 呢D先至係有HEART!!! 查實西苑最出名嘅係大哥叉燒, 幫襯咗十幾年, 今日好似第一次食燒鵝... HONEY專登ORDER黎比較下...


韭菜銀芽炒咸肉--簡簡單單, 平價嘅材料, 落到西苑嘅廚師手上, 一樣可以整得好好味...


是日糖水(免費贈送)--我照舊係大大粒+起晒沙+少甜嘅紅豆沙, HONEY就揀咗馬蹄露, 不得不提, 西苑D馬蹄露唔似出面D馬蹄露咁一PAT槳糊咁o架, 好清甜, 如果有馬蹄露揀, 記得試下呀!!! 紅豆沙都係必吃o架!!!


平時o黎幫襯, D Service都幾好o架啦, 呢2個星期仲好上加好, 可能係因為我上星期o黎食晚飯時, 派咗利是啦, 哈哈~


如果大家想食西苑, 記得訂位呀, 近排都好爆呀!!!


曾經有一段時間, HONEY同我都覺得西苑冇以前咁好食, 我估係因為成日食, 食厭咗嘅關係... 經過尋晚鏞記酒家 Yung Kee Restaurant一役, 我地今晚即時覺得西苑好好食, 服務又好, 價錢又合理, 之前真係身在福中不知福!!!


是次每人消費約$200元
味道: 4 環境: 4 服務: 4 衛生: 4 抵食: 4
###
地址 : 側魚涌太古城中心二期二樓208號
電話 : 2885-4478


2011年2月20日 星期日

(X庸)記酒家 Yung Kee Restaurant


17 February 2011, Thursday (年十五)


(X庸)記酒家... 元宵節壓軸好戲??? 結論係... NO!!!


原本打算一次過慶祝西方情人節同埋中國情人節, 結果換o黎一個Bad Memory... Oh No!!!!!! (X庸)記, 可以改名叫庸記啦!!! 平庸, 庸俗是也!!!


唸住今晚豪一豪佢, 所以ORDER咗「(X庸)記獲獎菜推介(兩位用)」!!!


酸薑皮蛋(餐前小吃)--我放皮蛋入口一咬... 嘔!!!!!!!!!
好嘔心, 好臭, 好想嘔, 但係如果吐出o黎, 成口都仲係果種味, 肯定嘔得出, 唔夠時間啦, 唯有吞落肚, 狂飲茶沖走D怪味... 好辛苦呀...
點知好戲仲在後頭... 一吞片酸薑, 咳咳咳咳咳咳... 好嗆呀!!!!!! 仲枉外間話佢同
福臨門 Fook Lam Moon同大班樓都係響同一個地方購入子薑, D薑係冇根呀, 但係D調味好唔掂囉...
呢碟前菜係唔知幾時放係我地張枱, 但係原來係OPTION o黎o架, D侍應竟然問隔離枱要唔要酸薑皮蛋, 個客答"唔要"囉...


金牌燒鵝件併紮蹄--凍嘅?????? 平時食嘅燒鵝都係微暖, 點解呢度D燒鵝係冰凍o架?????? 味道尚可, 但係D肉好韌, D皮唔係特別脆, 想當年屯門嘅海霸燒鵝都好食過佢多多聲... 不吃也罷!!!!!! 紮蹄都好一般...


禮雲子琵琶蝦--禮雲子係蟛蜞的蟹子, 用豆腐皮包住蝦、露筍、甘筍絲, 然後炸, 再放D海草係底... 隻蝦食落有蟹膏味, 不過唔係鮮味, 亦唔算好味... 一句講晒, 食完一隻, 唔會有貪念想食多一隻... 隻伴碟嘅蟛蜞係冇味嘅, 海草有小小腥...


松茸湯鮑--松茸好似好矝貴咁, 冒住敏感嘅危險, 飲咗落肚... D湯嘅味道... 咁似蓮耦煲章魚嘅??? 隻鮑魚腥o架, 嘔... 唔掂呀!!!!!!


嗶D餡出o黎, 等大家睇真D... 不過唔好以為隻鮑魚好大, 因為佢隻湯匙係超迷你SIZE, 唔係正常SPOON SIZE...


石上麒麟--D魚好腥, 浸係酸醋入面然後先食都好腥, 真係差D嘔番出o黎... D火腿都好似腥腥地, 唔知係咪D魚嘅味影響所致...


雲吞細蓉--嘩, 成粒雲吞有9成都係皮, 合埋眼食嘅話, 真係一D都食唔出係雲吞!!! 求其太古城一間麵店都好食N倍!!! 差差差!!!


香芒布甸--嘩!!! D芒果酸到盲嘅都開眼!!! 好難食呀!!!


HONEY全晚不停重複講同一句說話"都冇HEART嘅"!!!


坦白講, D Service真係差o架, D侍應行行企企都唔斟水, 又唔換碟, 我地食成千銀都係咁... 隔離枱D遊客仲慘, 有免費贈品收--黑面+悔氣說話, 皆因佢地唔肯ORDER侍應重複又重複迫佢地ORDER嘅o野...


好難食呀, 冇下次呀!!!!!!!!!


呀, 仲有仲有, 我去廁所時, 有女職員剛去完廁所, 佢冇沖水, 個座廁入面黃甘甘咁, 好嘔心呀... 幾經辛苦, 我先沖到水... 之後又聽到隔離果格都話沖唔到水, 都係女職員, 之前果個冇沖廁嘅女職員, 竟然叫仲係廁格入面果個女職員由得佢, 唔使沖水... 之後知道對方係開大嘅, 先冇再出聲... 嘔 X 10000!!! 聽完呢D對白, 我仲使食飯嘅!!!!!!


是次每人消費約$500元
味道:1;環境:3;服務:3;衛生:2;抵食:1
###
地址 : 中環威靈頓街
電話 : 2522 XXXX

2011年2月19日 星期六

中國情人節一日遊

17 February 2011, Thursday (年十五)


今日又情人節??? 唔係早幾日先情人節完咩??? 係呀, 係呀, 今日係中國情人節呀, 即係元宵節呀!!! 祝大家元宵節快樂!!!


我今日變咗遊客呀!!! 外國o黎嘅朋友, 好多都會o黎上環荷李活道文武廟影番張相留念...


想行去泰昌蛋撻, 點知行錯路, 去咗必列者士街嘅XXX青年會...


幸好HONEY嘅電話有得上網, 幾經辛苦, 終於搵到出路...


路過公利真料竹庶水, 忍唔住買咗支熱竹庶水, 一路行一路嘆... D竹庶水真係甜到漏呀, 仲好重庶味, 正到暈...


行到腳都軟, 終於到咗泰昌蛋撻啦, YEAH!!! 嘩, D竹庶水已經甜到漏, 點知D蛋撻仲甜, 利害!!! 不過唔知係咪錯覺, 好似個直徑同高度都減少咗咁嘅...


我地嘅元宵節仲未慶祝完o架, 大家請密切留意元宵節下集--鏞記酒家 Yung Kee Restaurant!!! 呵呵呵呵~


2011年2月17日 星期四

幫老公買比自己嘅情人節禮物... Leonidas 朱古力!!!

14 February 2011, Sunday (年十二)


今日係情人節呀!!! 祝大家情人節快樂!!! 我今晚一個人食牛肉肉丸粥+生菜咋... HONEY要返工呀...


回家途中, 睇怕佢都冇時間買禮物架啦, 自己幫佢預備埋啦, 最緊要記得找數比我就得啦, 呵呵呵呵~


Leonidas 心型朱古力, 4種味道! 慶祝情人節之餘, 同時可以做埋善事, 好有意義!



我之前係電視睇過佢地嘅故事, 真係好Touching, 大家真係要多多支持Confisterie Benji Ltd!!!


~ Leonidas 朱古力專門店 小檔案 ~


Confisterie Benji Ltd 被香港政府確認為社會企業,公司旗下Leonidas比利時新鮮朱古力專門店Leonidas Chocolates & Cafe 和青衣城 La Parole法國餐廳的所有收入扣除開支後,全數撥款支持庭恩兒童中心。庭恩兒童中心致力幫助低收入家庭有語言障礙的兒童,讓他門獲得適當治療,積極融入社會。


2011年2月16日 星期三

好日子

13 February 2011, Sunday (年十一)


今日E5的團拜日子, 又凍又落雨, 千里迢迢咁入到屯門, 竟然冇得同宇宙最強@妹妹玩, 又冇得同勁舞DANCING豬@妹妹玩, 我唔制呀))))))


感謝貓兄幫忙等位, 辛苦晒!!! 大時大節, 中午時段, 等位飲茶絕對係超難...


燒腩仔--都幾香脆, GOOD!!!


蘿蔔絲蝦餅--外表相當嚇人, 但味道都OK喎...


蝦腸--不錯...


炸兩--好似唔記得食...


鳳爪--不過不失...


流沙包--冇機會食, 因為平時唔食野嘅宇宙最強@哥哥竟然一口氣食咗2個, 相信... 一定勁好味...


腐皮卷--脆脆的, 不錯...


沙律卷--好好味呀!!!


點心拼盤(潮式糯米卷, 蝦餃, 唔知咩餃, 千層糕)--個賣相好嚇人, 好似一打壽包咁大個籠, 送餐放低時, 我仲同佢講我地冇ORDER喎, 哈哈...


燒賣--不過不失...


印象中, 之後KaKaMa一家到臨後, 有加單, 不過大家已經忙於講八卦消息, 所以唔記得影相...


感謝鑽媽請客, 下次黎我地頭, 我請客!!!


飲完茶同貓兄行陣街, 行行下重臨舊地, 感觸良多... 8B成員對呢張相應該一D都唔陌生啦, 哈哈哈哈...


是次每人消費約$90元
味道: 3 環境: 3 服務: 3 衛生: 3 抵食: 3
###
地址 : 屯門屯隆街2號屯門時代廣場北翼地下39號、51-53號舖
電話 : 2618 9392