網頁清單

2011年1月28日 星期五

囍宴 東‧豐 Xi Yan.

26 January 2011, Wednesday


今晚又囍宴, 終於放棄食套餐, 散叫餸...


秘製鎮江骨(細)--味道OK, 可惜太多肥肉, 每一舊骨D肥肉有成2CMX2CM咁大, 仲要唔係五花腩果種一層肥一層廋, 實在難以吞落肚... 唯有咬走D肥肉先食...


欖菜肉鬆四季豆--第一啖, 好鹹呀... 第二啖, 好腥呀... HONEY食完仲胃痛, 我估D四季豆冇煮透, 所以有咁嘅情況出現...


大肚婆炒飯--炒得好乾身, 可惜冇咗之前食嘅香味...


早前嘅驚喜, 已經盡失!!! 如無意外, 我地暫時都唔會再黎... 估唔到, 今日終於帶咗隻SONY相機黎影靚相, 但係可能會係我地最後一次幫襯...


是次每人消費約$105元
味道: 2 環境: 4 服務:3 衛生: 3 抵食: 2
###
地址 : 太古太古城道20號寧安閣地下 505-508號舖
電話 : 2380 0919   


2011年1月27日 星期四

和光鐵板燒日本料理 Tokyo Wako

24 January 2011, Monday


和光燒肉放題... 已經想試超過2年... 只可惜, 黃埔分店交通實在太唔方便!!! 仲要只得2個時段選擇, 6-8PM 或 8-10PM... 6點, 未免太早啩... 8點, 食完又太夜... 所以一直都冇機會去到...


舊年發現佢係銅鑼灣開咗分店, 但冇緣份即係冇緣份, 一直都食唔到... 2011年, 緣份到!!!


我遲咗小小到, DD同無敵已經ORDER定成枱餸, 等我一到就有得食... 嘩... 場面未免太誇張啦... 未算!!! 呢度只係我地當晚所食嘅一小部分...


菠蘿青檬汁好正... 和光沙律都好新鮮, 仲係配我最愛嘅黑醋汁...


什錦刺身係贈送嘅...


燒日本南瓜幾OK, 燒京蔥好正...


冷豆腐很不錯... 食燒肉配秘制溫室青瓜真係好正, 可以舒緩一下熱氣嘅喉嚨... 燒茄子都OK...


豬肉同雞肉不及牛肉出色, 但仍然美味...


南瓜天婦羅好甜呀...


太多食物, 都分唔到邊碟打邊碟, 唯有貼埋張點菜紙比大家自己睇...



燒廣島蠔超巨型, DD同無敵最少ORDER咗4轉... 牛胸腹超正, 記得食多D...


服務好好, 不停換網, 又勤於收碟換碟, 態度良好, 可能因為我地係食6-8PM時段, 人客唔多嘅關係啦...


一句講晒, 咁嘅價錢, 有咁環境(卡位), 有咁美味嘅食物, 有咁好多服務, 我點可以唔再黎呀?!!


是次每人消費約$188元
味道:4;環境:4;服務:4;衛生:4;抵食:5
###
地址 : 銅鑼灣軒尼詩道502號黃金廣場9樓
電話 : 2895 6668/2895 6608


2011年1月26日 星期三

「我們這一家」來了新元朗中心

22 January 2011, Saturday


今晚又有壽宴要出席, 黎咗新元朗中心...


嘩嘩嘩!!! 見到「我們這一家」同大家一齊賀年呀!!!


我早幾日都電咗個同花師奶一樣嘅髮型, 埋去襯下先...


平日去新元中, D地產經紀係企係扶手電梯出口, 比攔杆圍起晒, 今日唔知點解, 好似蝗蟲咁, 全個商場都係, 起碼有幾佰隻, 拍極都拍唔晒, 好好好好煩呀!!! 如果我識龜波氣功就好啦, 離遠就可以一野震走晒佢地!!! 人地黎食飯咋, 要買樓嘅一早係西鐵出閘口就已經比人MARK左啦!!! 佢地仲要衰到圍埋一堆攔住條路, 一個問完, 另一個明明聽到"唔買"都仲又問, 幾經辛苦越過一個障礙, 重有幾十個障礙等緊你, 我已經病緊, 好想快D去到酒樓, 佢地係度阻住條路, 搞到我更加討厭佢地!!!


冇咩必要, 都唔會再去新元中...


2011年1月25日 星期二

Royce Baton Cookies (Hazelnuts & Cacaonibs) 榛子朱古力棒棒曲奇

20 January 2011, Thursday


Honey嘅朋友今日送咗盒榛子朱古力曲奇比佢, 原本冇咩期望, 因為想當年去北海道旅行, 導遊極力推介我地買呢隻牌子嘅朱古力薯片, 嘩, 一食落去, 又鹹又甜, 真係呻笨...


未打開之前, 我地係度打賭入面有幾多塊曲奇, 我估8塊, 因為試過買D大大盒嘅日本手信, 一打開, 得果幾片, 用個大大嘅膠模一片片分開晒...


嘩!!! 估唔到有咁多塊... 好抵食呀...


味道真係Ichiban!!! 唔係一味喪甜, 而係淡淡嘅榛子味, 香濃嘅可可豆味, 塊曲奇仲好鬆脆, 好得呀!!! 真係食到唔停得口!!!


Royce Baton Cookies (Hazelnuts & Cacaonibs)... 拉姑極力推介!!!


2011年1月24日 星期一

鹿鳴春飯店 Spring Deer

19 January 2011, Wednesday


4年前無敵響呢度擺壽宴, 4年後重臨舊地, 今次就輪到龍媽擺壽宴... 最好野係, 大家都好似冇咩印象, 好彩我果時已經開始寫BLOG, 大家睇完之後, D記憶就開始返黎... 不枉我一直堅持繼續寫BLOG, 原來除咗自己冇記性, 自己D朋友都好冇記性架, 哈哈哈哈~


上次同今次重複嘅食物有松鼠魚、窩燒肘子、小籠包、高力豆沙香蕉...


賽螃蟹--OK啦...


津白--OK啦...


蔥爆牛肉--OK啦...


窩燒肘子--我覺得OK, 不過DD話好鹹...


酸辣湯--怕怕... 我一向都唔鐘意飲...


松鼠魚--都幾好肉地, 個汁可以點饅頭食...


小籠包--好味...


饅頭--冇味... 哈哈哈... 好正常... 無敵話點豆板醬都好好食...


高力豆沙香蕉--好味就幾好味, 但係... 點解... 冇香蕉, 同埋唔似豆沙, 似棗味多D... 唔通落錯單???


豆沙窩餅--豆沙餡勁多, 讚!!!


環境依然嘈雜, 開懷咁傾咗一晚計, 喉嚨都痛埋...


是次每人消費約$175元
味道:4;環境:3;服務:4;衛生:3;抵食:4
###
地址: 尖沙咀麼地道42號二樓
電話: 2366-4012

2011年1月22日 星期六

稻菊日本料理 Inagiku Japanese Restaurant [少林食神の推介(四)]

17 January 2011, Monday


今晚少林食神帶我地去「稻菊」食日本菜... 坐低時象徵式睇下餐牌, 之後佢相熟嘅2位廚師就由廚房走出黎同佢打招呼, 跟手佢就比咗個BUDGET比師傅, 叫師傅幫佢安排一下, 所以我地一路食一路都唔知仲會有咩食... 咁大個女都係第一次咁食法...

刺身拼盤--白魚我同HONEY一向唔多食, 生蝦我地又唔食, 所以同枱嘅朋友勁開心, 因為佢地可以食埋我地果份.... 我最鐘意係帶子, 好新鮮, 好有咬勁, おいしい (oishii)...
 

天婦羅汁, 檸檬, 綠茶鹽, 幼海鹽--點小小綠茶鹽都夠味...


稻菊嘅天婦羅 (Tempura) 係必吃招牌菜, 選用優質芝麻油和棉花籽油, 用料新鮮, 即點即炸, 炸起嘅天婦羅又薄又脆 。師傅手藝更是一絕, 吸油紙上面, 一滴油都冇!!!


天婦羅目光魚(左) -- 鱭魚科, 又名"鳳尾魚", 俗稱"烤籽魚", 炸得外脆內Juicy, 完全冇骨, 好好味, 我二話不說吞晒落肚...
天婦羅竹蝦(右) -- 師傅將蝦頭炸到好似朵花咁, 好靚呀~ 蝦身又係粉薄又脆, 蝦肉一D都唔乾身, 一隻真係唔多夠喉...


http://fuku-tabi.jp/tw/foods/2010/04/000314.html
目光魚是生活在福島縣北方界限的海域,體長10至18公分,它也是磐城市的「市魚」。儘管它肉質是白色的,然而其適度的魚脂,讓您吃起來高雅又清淡,不論是用烤的或油炸的都能令人垂涎三尺。


天婦羅鰻魚 -- Ichiban!!! Oishii... 好好味嘅鰻魚, 皮脆肉嫩, 咬落啖啖肉, 仲滲出淡淡嘅鰻魚香, 好好食呀~ 我想1個人食晒成碟呀...


天婦羅鮑魚 (前) -- 啖啖肉嘅鮑魚, 好滿足呀~
天婦羅海膽 ( 後) (うに ; Sea urchin) -- 海胆用紫菜包著黎炸, 個樣好得, 可惜... 我同HONEY都唔食海膽, 從少林食神滿足嘅表情睇黎, 真係好好味咁...


天婦羅龍蝦 -- 咁大隻龍蝦先得4舊肉, 好似小左D... 從味道同口感嘅角度黎講,
龍蝦都係食鐵板燒好食D, 做天婦羅有小小浪費咗...


炸魚--魚骨炸到脆晒, 佢地用手搣黎食, 話當食薯片喎...


食完天婦羅 (Tempura), 就輪到鐵板燒 (Teppanyaki) 出場啦!!! 女師傅因為跟從丈夫o黎香港生活一段日子, 專程過o黎稻菊坐鎮...


鐵板燒大蝦 -- 味道都唔錯, 都好多蝦肉...


鐵板燒鵝肝多士 -- 好好咪呀D鵝肝, 我食咗2大件呀, 呵呵, 好開心呀~ 個奇異果都幾酸, 但係就中和咗鵝肝嘅油膩感, 好MATCH呀~


和牛肉眼鐵板厚燒--蒜片燒得極之香脆, 牛柳粒都好好味呀, 冇出血得o黎又唔韌, 食到唔停得口...


鐵板炒飯--廚師專登其中1碗飯走牛, 好有心思... 炒得好乾身, YUMMY!!!


鐵板炒雜菜--一般啦...


鐵板燒 (Teppanyaki) 整體食物唔夠熱辣辣, 食鐵板燒始終都係坐係鐵板燒枱食先最好味, 一來廚師一煮起食物就可以即刻送到你面前, 二來又可以欣賞廚師的手藝, 三來聞到食物烹調食物時嘅香味, 三種感觀享受... 天婦羅 (Tempura) 亦然...


好多張白金卡都有85折, 訂枱時記得問清楚...

是次每人消費約$700元
味道: 5 環境: 5 服務: 5 衛生: 5 抵食: 2
###
地址 : 尖沙咀麼地道69號帝苑酒店1樓
電話 : 2733 2933

2011年1月21日 星期五

再戰「鰂魚涌樹木研習徑」導賞遊 Quarry Bay Tree Walk

16 January 2010, Sunday

上星期行過一次, 覺得好舒服, 今日得11度, 其實太凍, 唔適宜行, 不過LAST一日, 真係好想去多一次...

一上山見到好多榕果子...

年近歳晚, 花圃已經準備就緒, 大量年桔任君選擇

2011年1月19日 星期三

終於有得回收玻璃樽啦!!!

15 January 2011, Saturday


等了又等... 等了又等... 等咗咁多年, 我屋企果D玻璃樽終於等到有得回收嘅一日啦!!! YO HO!!!


你睇, 真係堆積如山, 根本冇位再擺, 廚櫃入面都仲有, 客廳都有呀...


比較省鏡小小嘅, 都拎咗黎做花樽, 物盡其用!!! 因為繁殖過多, 搞到拎咗好多樽呢D水種植物返公司...


好多年都冇試過聽完政府嘅新聞後會有開心嘅感覺, 今晚真係超開心, 個計劃唔好試咁耐呀唔該, 快D推廣到我屋企樓下啦唔該, 快呀...


新聞詳情: -


6公屋推動玻璃樽回收
 (明報)2011年1月15日 星期六 16:45
屋村玻璃樽回收    試驗計劃今日正式啟動,以推動本地玻璃回收。環境保護署及香港房屋委員會    攜手合作,在東九龍6個公共屋村推行一項為期12個月的屋村玻璃樽回收試驗計劃,讓更多市民參與玻璃樽源頭分類回收,以及推動本地廢玻璃樽的回收再造。6個參與試驗計劃的公共屋村分別為彩盈村、順利村、順安村、順天村、牛頭角    上村及油麗村。房委會已在參與屋村內的住宅樓宇大堂或出入口附近放置的三色分類回收桶旁邊,加設一個淺綠色的玻璃回收桶,即第四色桶,方便居民在日常生活中將玻璃樽分類回收。參與計劃屋村收集到的玻璃樽會被循環再造成玻璃砂,以替代天然河沙,用於製造行人路磚。(即時新聞)


http://hk.news.yahoo.com/article/110115/4/m8qd.html


2011年1月17日 星期一

囍宴 東‧豐 Xi Yan

13 January 2011, Thursday


又又又又囍宴??? 係呀, 繼續報導埋個套餐邊樣好食, 邊樣唔好食呀嘛...


餐湯、口水雞、白飯... 通通唔影... 因為近排寫得太多...


仁稔酸薑糖芯皮蛋--唔係好得, 皮蛋有輕微我怕怕嘅怪味... 酸薑有根同埋小辣... 仁稔最可怕, 我咬咗4分1已經想吐, 以為自己有問題, 再咬多4分1, 真係頂唔順... HONEY仲利害, 咬咗4分1已經唔肯再食...


煲仔梅菜扣肉--好失望!!! 梅菜好多沙, 又唔夠梅菜味, 仲幾硬下... 扣肉唔夠淋唔夠入味... 成煲野仲唔係好熱, 正常煲仔菜會辣嘴o架嘛...


今晚個餐湯更加完全無可能係燉湯...


今晚個口水雞叫咗小辣, 結果係勁辣...


今晚食物真係跌晒WATT... 都要等一排睇定D先好再去...


是次每人消費約$125元
味道: 2 環境: 4 服務:3 衛生: 3 抵食: 2
###
地址 : 太古太古城道20號寧安閣地下 505-508號舖
電話 : 2380 0919   


2011年1月16日 星期日

囍宴 東‧豐 Xi Yan

3 January 2011, Monday


又囍宴??? 係呀, 因為個套餐太抵食, 所以又去試埋其他配搭...


餐湯--越來越唔似燉湯, 誠意分銳減...


前菜--情人果--泰國青芒果, 酸咪咪, 好開胃...


主菜--口水雞--因為只有4款魚+4款雞選擇, 係唔想加錢, 又唔想食白切雞嘅情況底下, 唯有繼續口水雞... 絕對濃味...


煲仔菜--蛋黃肉--雖然係煲仔菜套餐, 不過都好多味唔係煲仔菜, 味道偏甜, 不妨一試...


白飯要另外ORDER... 不收茶芥... 都算抵食啦... 開張時覺得佢好貴, 又食唔飽, 不過而家週圍都狂加價, 得佢減價, 所以我地個飯堂唔可以唔加埋佢... 


已經唔記得係第幾次冇帶相機啦, 都係果句, 希望下次會記得帶啦...


是次每人消費約$125元
味道: 4 環境: 4 服務:3 衛生: 3 抵食: 3
###
地址 : 太古太古城道20號寧安閣地下 505-508號舖
電話 : 2380 0919   


2011年1月15日 星期六

秋冬滋潤甜品--雪耳蓮子百合圓肉茶

9 November 2010, Tuesday

秋風起, 好乾燥, 要好好滋潤一下...

前排係IPAD睇咗D食譜, 呢一味「雪耳蓮子百合圓肉茶」, 無論材料同做法都係最簡單, 我家個廚房1年都係開得幾次爐, 就為佢開一開啦...

係咪睇見都想食呢...