網頁清單

2010年3月7日 星期日

容龍海鮮酒家 Dragon Inn Seafood Restaurant

6 March 2010, Saturday

是日探訪鑽家, 為遲來的拜年及生日會... 可惜另一小壽星未能出席... 唔緊要啦, 下次啦, 總有機會!!!


貓兄為鑽鑽親自下廚... 登登登登... 朱古力芝士蛋糕!!! 都幾好味呀, 係朱古力味唔夠濃啫, 對於我呢個鐘情Mrs Fields Triple Chocolate Cookie嘅朱古力痴o黎講... HaHaHaHa...


之後我地去咗三聖村買海鮮... 正確D黎講, 係睇人買海鮮... 因為鑽媽識得果度D熟客仔, 熟客仔幫我地揀海鮮, 咁就唔驚比人呃啦... 多謝你呀, 熟客仔先生!!! 店員好Nice, 仲不停問我地要唔要同龍蝦合照...


買完海鮮就徒步去容龍"別墅"... 都起碼有廿年冇去過容龍, 細時係屋企人帶去, 想當年果度係有麻雀耍樂嘅...


上湯米--鑽鑽嘅私家食物...


容龍乳鴿--都OK多肉, 味道都OK...


豉油王原隻乾煎大蝦(海鮮加工)--嘩!!! 好好味呀!!! 好大隻, 啖啖肉, 仲好彈牙呀!!! 味道仲啱啱好!!! D殼又甜又薄又脆, 食咗落肚都唔覺...


芝士開邊龍蝦(海鮮加工)--又係大大隻啖啖肉, 用芝士同牛油焗架, 個皮脆脆地, 口感好特別, 一句講晒, 好味呀!!!


豉椒炒蟶子(海鮮加工)--我平時好小食蟶子, 因為覺得佢同生蠔一樣, 滑潺潺, 咦... 怕怕!!! 但係今次呢隻蟶子, 如果上碟時冇咗D殼, 我真係會以為佢係魷魚囉, 大大舊, 好彈牙, 正呀!!! 只可惜... 食到尾有小小沙, 即刻冇Mood...


蒜蓉粉絲蒸元貝--好大粒元貝呀, 好新鮮, 粉絲唔係太入味, 但仍然好正!!!


砵酒焗本地生蠔--生蠔我係唔食嘅, 熟蠔都唔多食, 不過佢呢個都整得OK, 一D腥味都冇, 亦冇滑潺潺嘅感覺... 簡單D黎講... 如果唔好食, 我食1隻就唔肯再食囉... 呢碟... 我前後食咗3隻囉... 呵呵呵呵...


蒜蓉蒸糕蟹糯米飯--嘩!!! 好大籠呀!!! D蟹仲好多膏呀!!! 仲好多蒜蓉同油呀!!! 食完都要側側地面同人講野, 驚人聞到果陣蒜蓉味...


再加個油鹽水浸菜遠, 4大1小, 差不多啦... 有甜品送, 係我至愛嘅紅豆沙... 仲有西瓜送, 都幾清甜呀...


熟客仔介紹, 埋單有9折, 爽爆!!! 買海鮮用咗$6XX, 容龍用咗$623, 即係$3XX 1個大人左右啦... 話好平又唔係, 不過唔算貴囉...


星期日晚坐滿晒客, 都幾嘈下, 8點幾門口都仲有好多人等位...


是次每人消費約$3XX元 (未知買海鮮exactly用咗幾多錢)
味道: 4 環境: 3 服務: 2 衛生: 2 抵食: 1
###
地址 : 屯門青山公路19咪半
電話 : 2450 6366


6 則留言:

  1. 流口水,好想食,忠問過N次點解唔Sunday食,hehehe
    [版主回覆03/13/2010 19:46:00]WaKaKaKa... 咁你唔食得住呀嘛, 咪冇改星期日囉...
    下次再食過!!!

    回覆刪除
  2. 下次等我好返再戰海鮮, 我呀叔話可以試下新開果間叫 "名門".
    海鮮齊頭 $600
    還有果碗名貴上湯米粉 $28
    但我老公話 d 龍蝦被香濃的芝士蓋咗, 食唔真龍蝦味
    當然我最欣賞 糯米飯, 當晚有剩少少打包回家, 昨日星期天晚上作夜宵, 老公都話好好 當晚有剩少少打包回家, 昨日星期天晚上作夜宵, 老公都話好好味, 好彩有打包.
    還有, 當天是星期六不是星期天
     
    [版主回覆03/13/2010 19:49:00]咁下次又要勞煩你阿叔引路啦...
    嘩... 碗名貴上湯米粉咁名貴架乜...
    好味到星期六當咗星期日... HaHaHa...

    回覆刪除
  3. 忠咁想食,叫佢做攪首約人啦,拉姑唔會反對入多來一次! 個焗龍蝦焗得唔夠,後尾翻熱好食啲,賓少呀!反正一啖都食唔晒成隻,為咩唔分開芝士同龍蝦肉各自食呢? 豉油王蝦蝦頭好正! 個蠔真係麻麻喎,條邊太乾,桶蠔正好多架,可能我唔鍾意本地蠔既蠔味,來佬蠔味淡啲,不過可能拉姑會怕佢入面仲軟綿綿,真係好味架! 仲有Nic你地咁怕油膩野,估你唔到鍾意個飯,我覺得太油太重蒜味,反而食唔到有蟹味啵…
    [版主回覆03/13/2010 19:43:00]下次試加拿大桶蠔吖!!!

    回覆刪除
  4. 我係何超個friend,hi....好好味wor....
    [版主回覆03/13/2010 19:44:00]歡迎光臨!!!

    回覆刪除
  5. 係未組團, 我都想報名, 不過最好係星期日呀!
    我想食個焗龍蝦同 焗蠔。
    [版主回覆03/13/2010 19:43:00]KaKaMa你同阿忠負責組團啦, 成咗團再Call我...

    回覆刪除
  6. 由九龍點去呀?
    [版主回覆04/21/2010 21:44:00]http://zh-yue.wikipedia.org/wiki/%E5%AE%B9%E9%BE%8D%E5%B1%85
    可以參考一下維基百科嘅容龍居嘅 交通... 希望D資料幫到你
     

    回覆刪除