網頁清單

2010年1月22日 星期五

品坊 the SQUARE


21 January 2009, Thursday

台山四寶搵食兵團再度出動!!!

今次之所以選呢間Buffet, 係因為被佢嘅網頁(http://www.thesquare.com.hk/cn/promotion/index.html)所吸引... 上等波士頓龍蝦,澳洲和牛,帶子,三文魚柳,沙甸魚,美國牛肋骨肉,羊扒及德國豬肉腸等,由廚師在鐵板燒區為您即席炮製... 台式黑芝蔴油醉鷄蟹鍋、京式片皮鴨配鮮士多啤梨墨西哥烤餅、參鬚紅棗浸鱸魚、參巴爆爆牛仔肉、意式煮蜆、孜然烤羊脾、冧酒焗排骨、迷你獅子頭、豬骨濃湯豆腐煮白蜆、天多利爐焗瑪沙那燒鷄、咖喱果仁提子烤餅等,還有新鮮美味的海鮮供應... 甜品仲有即席焗製的朱古力心太軟布甸伴杏仁雪糕、燕窩酥皮疍撻... 由1月8日起至3月7日,自助晚餐繼續以超筍價七折優惠饗食客,此外,凡於1月8日 至2月11日出生的壽星仔女惠顧,更送「生日優惠」,只需四人同行或以上惠顧,即送免費紅酒乙瓶...

睇落係咪好吸引呢...

免費紅酒乙瓶--2008年阿根廷出品... 雖然我唔識飲, 但感覺真係麻麻... 酒店聲稱呢支酒價值HK$250, 我就話HK$25就差不多...
Cheers!!!

由"黑面"廚師在鐵板燒區為您即席炮製... 上等波士頓龍蝦得個殼... 羊扒比想像中好... 澳洲和牛都OK... 帶子好硬, 同埋似烚熟多D, 仲好多沙... 完全見唔到有牛肋骨肉...


沙律有5款... 蒙古牛肉沙律真係估佢唔到, 唔錯唔錯... 意式沙律感覺酸酸地, 係有問題果隻酸... 薯仔沙律都OK... 木瓜低脂乳酪沙律簡直一流, Encore...



龍蝦仔勁唔掂, D肉灰色架, 仲要隻隻都係, 我真係唔敢放入口... 青口都幾腥, 麻麻地...




中途試一Round甜品先... 燕窩酥皮疍撻真係要搵法證先鋒幫手搵搵D燕窩係邊度... 芒果拿破崙餅好一般... 泡芙食完都唔知咩味... Crème Brûlée不過不失啦...




開始食熱盤... 香草炒薯都OK... 意式煮蜆完全冇味... 魷魚仔都OK... 炸豆腐凍咗, 我又冇點醬, 完全唔好味... 參巴爆爆牛仔肉好韌呀... 參鬚紅棗浸鱸魚D參鬚係咪唔記得落呢? 味道一般啦...



京式片皮鴨配鮮士多啤梨墨西哥烤餅--好難等, 因為個廚師要兼顧魚蛋檔... 我仲要拎錯醬, 唉... D肉切到咁細, 唔夠攝牙罅, 但味道尚可...




因為驚尾聲時會冇晒雪糕, 所以提早食... 我食咗朱古力同士多啤梨, 好飽呀... 另有雲呢拿同Cookies & Cream可選...



食到都9成飽, 先開始食沙律, HAHA... 材料都幾新鮮...



Ham選擇不多, 淺嘗兩片就算...



食咗2個鐘, 先拎到蟹腳, 全靠貓兄係外面打圈唔返o黎, 返到o黎仲要大大聲咁話"我好唔知醜咁拎咗4隻呀!!!", 完全係比說話隔離果枱聽, 因為佢地無恥到, 每次一有蟹腳, 都拎十幾隻, 等於拎走全部咁滯, 而酒店方面亦好過分, 懷疑佢一個鐘先Refill一次, 每次十幾隻, 每枱都分唔到半隻... 蟹腳味道偏鹹, 尚算新鮮...



桂圓蓮子茶--尚可... 飲咗佢, 再飲埋杯熱檸茶, 真係飽到想嘔...



朱古力心太軟布甸伴杏仁雪糕--接近9點, 見到有架車仔推出o黎, 仲以為係梳乎李, 原來係心太軟, 我就真係冇本事再食得落啦, 唯有問貓兄拎一啖o黎食下... 味道都唔錯, 雪糕係Dryers, 呢味可算稍為有誠意之作...




由於只得貓兄一人之力, 所以飲剩好多紅酒, 又唔比人拎走, 好浪費呀!!!



今餐雖然唔係話好好味, 但樣樣試D都攪到飽到差D嘔... 搭完MTR要行路返屋企, 幫助消化, 返到屋企仲要食埋HELLO MIMI話梅, 個胃先開始冇咁頂, 之後仲要搵D家務做下, 洗衫, 晾衫, 換床單... 總算可以瞓得著...



其實呢度舊時係大華酒店, 8B都有o黎食過Buffet, 我仲好記得, 食到咁上下, DD入廁所扣喉, 出到o黎好似咩都冇食過咁, 再食... 真係佩服到五體投地...



是次每人消費約$222元
味道: 3 環境: 3 服務:2 衛生: 2 抵食: 2 
###地址 : 佐敦彌敦道348號九龍諾富特酒店1樓 

電話 : 3965 8788 / 3965 8782

2 則留言:

  1. Cheers!!! 呢張影出來效果很好啊!

    回覆刪除
  2. 我以為尖沙咀果間 I-SQUARE, 咁你同貓兄講這不用理會我堂妹的故事啦
    [版主回覆02/02/2010 23:05:00]我地開頭都以為係尖沙咀果間 I-SQUARE...
    你堂妹有咩故事?

    回覆刪除