網頁清單

2009年10月10日 星期六

韓松韓國料理 Hansong Korean Restaurant

6 October 2009, Tuesday


轉眼又到十月之星叙餐!!! 龍爸問龍媽"又食???"... 哈哈哈... 唔止佢有咁嘅疑問, 其他成員同我都有同感...


跟住地圖行到o黎, 先發現係"九州市場"以前的位置... 十年前我地都係坐房, 仲係呢度宣佈人生大事... 估唔到全部人都記得...



席間無敵話我冇交功課(9月之星日式放題 銀座藏人), 其實係佢冇上堂至真呀, 人地一早趕起咗份稿啦...



何超Book咗房, 一閂埋度門, 出面真係咩都聽唔到, 私穩度極高... 房內仲有空氣清新機, 抵讚!!!



每人一碟牛肉汁, 蔥花, 伴肉吃感覺冇咁油膩... 麥茶仲可以要凍嘅, 服務一流...



前菜碟碟都唔錯, 右下角果碟仲從未食過, 估計係牛蒡... 我地9個人比咗18碟, 份量都算足...



每次"睇餐牌環節"通常都搞半粒鐘以上... 攪咗好耐, 臨落Order前先隊個套餐餐牌比我地... 佢個6-8人套餐基本上有齊我地想叫嘅o野, 追加200g牛胸骨肉, 再加海鮮手切麵, 另外餐廳又送2客石鍋蒸雞蛋... 睇落都好夠食...


(餐)石板泡菜五花腩(厚)--原先驚好肥, 但係燒完D油流走咗, 一D都唔肥, 仲幾正添喎...
(餐)醃豬肉--卷得好靚, 燒完又係唔多油, 包住D洋蔥一齊食都唔錯...



(餐)王牛排--好甜美, 不過何超嫌太熟好UN, 比埋我食... 哈哈... 益咗我...
(餐)醃雞肉--我食完都唔知自己食過雞肉, 返o黎寫BLOG先知... 哈哈...



石板係斜嘅, 將D肉放係高果邊, 矮果邊就放泡菜, D泡菜吸收晒五花腩流出o黎D肉汁... 同埋D肉流出o黎D油都會由上而下咁流走, 唔使攪到D肉油淋淋咁, 即刻覺得健康好多...


(餐)西冷牛排--切到一小塊咁, 入口Size啱啱好, 感覺食極都仲有咁...



全程有韓國小生幫我地燒, 唔使自己落手落腳, 有好有唔好啦...
好嘅就係佢會燒得剛剛好, 唔會燶, 舒舒服服有得食, 又唔會整到D衫一陣味...
唔好嘅就係冇咗果種燒烤嘅氣氛囉, 就連邊一碟係"追加200g牛胸骨肉"我都攪唔清楚...


(餐)海鮮蔥花餅--份量十足, 味道都OK, 同埋唔會成口粉咁...



(餐)韓式辣年糕--嘩))) 好辣呀))) 但係食落又好彈牙, 越食越想食...



(餐)韓式炒粉絲(豬)--呢個味道唔錯, 開頭仲個個都話要加多一客, 後尾大家都飽到唔郁得, 所以先冇再加...



(餐)香菇牛肉火鍋(L)--D牛肉去晒我個碗度, 搞到暈妮投訴話"牛肉鍋冇牛肉嘅"... 哈哈... 唔關我事o架, 唔係我分o架... 同埋太多菇係我果碗, 搞到我好浪費...



(餐)燜牛肋骨--牛肋骨好淋好入味, 蘿蔔仲好味...
(加)海鮮手切麵--呢個冇機會品嚐, 因為Miss Chan Chan抱病出席, 需要食D清淡D嘅食物...



(送)韓式石鍋蒸雞蛋--呢個麻麻地, 又唔似我地中式蒸蛋咁滑溜, 口感似鬆糕...



席間大家不停提及對上一次韓國燒烤嘅不愉快經歷

, 但係又UP唔出間野叫咩名, 所以我就翻查一下紀錄, 比條Link大家重溫下... ( 韓國錦城飯店)
原來對上一次又係暈妮話要食韓燒, 終於發現佢嘅至愛啦 ... 有寫BLOG真方便, 冇寫BLOG就一定唔記得晒LU...


我個人認為, 呢間韓松絕對食得過!!! 價錢唔貴, 食物份量足, 味道又OK, 服務相比好多韓國餐廳算好好, 環境都好舒適!!! 我都要帶Honey o黎試下先...


另外要多謝DD去日本旅遊嘅手信"木筷子", 同埋佢細心挑選嘅當地美食(1盒9塊餅)... 口感似曲奇... 享用時腦海裡面諗起Cookies(9餅女), 不過唔敢講出o黎, 希望我地唔使拆伙變餅碎啦, 哈哈哈哈...


是次每人消費約$178元
味道: 4 環境: 4 服務:4 衛生: 4 抵食: 4
###
地址 : 尖沙咀柯士甸道144號祥景樓地舖B-C及1樓A-B室
電話 : 2736 8670


7 則留言:

  1. 下次要去試, 韓燒是我至愛, 睇佢環境真係唔錯, BOOK 房要唔要最低消費?

    回覆刪除
  2. 自己燒唔使太熟,會正d,完全符合哂拉姑要求!多謝哂,好飽肚呀!p.s. Book房無最低消費tim

    回覆刪除
  3. 我覺得人地燒埋都好唔洗煩,如果佢聽我地講牛肉唔好整咁熟就仲正!

    回覆刪除
  4. 我都喜愛有人燒, 剛剛好; 其實上星期五我都有想過去這兒,  但又怕帶住囝囝乘車不方便, 下次一定要返抄!

    回覆刪除
  5. 炒年糕真係比想像中好食呢,但真係辣到飛起,雖然我怕辣但都忍唔住食完再食! 我真係有啲不滿樣樣野都燒到十成熟,好"鞋"呀,下次要睇實個哥哥仔,頂多九成熟就要夾起牛肉! 個個職員都好好禮貌,不斷添茶都無問題,好鍾意,會再來食過! 究竟幾多人先可以訂房呢?有無人知?

    回覆刪除
  6. 返抄叫埋我,話時話呀韓國小生係我面前燒,都無攪到成身味喎

    回覆刪除
  7. To 無敵 & 貓頭 : 基本上佢只聽得明10個中文生字左右...
    To 力高 : 咦?!!! 你平時同佢地一樣, 鐘意食5成熟格, 點解今次...
    屈指一算, "翻炒團"成員已經有力高, 貓頭, DD, 拉姑, 加埋未炒過嘅Jan, 足足有5個人... 我唸搵多2個已經一定可以Book房...

    回覆刪除