網頁清單

2009年6月30日 星期二

小南國 Shanghai Xiao Nan Guo Cuisine (II)

星期六(2009年6月27日)去咗尖沙咀幫honey影相, 之後沿星光大道, 行咗去尖東搵食, 咁上次拉力早食過小南國好好味, 所以我提議honey去試下...


查實小南國係我地嘅"飛佛", 由佢係銅鑼灣糖街開"小南國狀元樓", 之後係銅鑼灣廣場附近開"小南國", 我地都有去試...



招牌小籠包--還是覺得翡翠好D... honey話"D皮好厚, 唔好食"...


糖醋小排骨--甜甜酸酸, 啱晒夏天食, 拉姑推介!!!


大蝦粉絲煲--蝦啖啖肉, 粉絲吸晒D汁, 超好味, 拉姑推介!!!


如意卷--紅豆味濃, 又唔太甜, 正, 拉姑推介!!!


原本好滿足... 皆因食物, 環境, 服務都好好... 不愉快事件之後發生... 話說我地埋咗單, 輪流去toilet, 咁honey見到中銀卡有優惠, 我地又食咗HK$325, 咪問D職員, 拎番個贈品"花生酥核桃酥"...
之後好似人球咁... 幾經轉折, 有個女部長埋黎...


女部長 : 300蚊係食物, 唔包括加一
Honey    : 咁扣咗加一, 都300蚊啦
女部長 : 扣咗加一, 得295蚊
Honey    : 你唔係差5蚊都唔比我地呀嘛
女部長 : (嘰哩咕嚕... 心虛...) 減埋茶芥, 得270蚊...
拉姑   : 寫明惠顧300蚊, 即係計簽卡啦...
女部長 : (繼續嘰哩咕嚕... 完全冇打算比番我地...) "花生酥核桃酥"有數架(Inventory Control), 唔可以送...



最後, 係我地要求下, 先比碗糖水我地了事...



咁做生意, 太唔老實, 當晚得唔夠十枱客, 佢咁攪法, 即係叫我地以後唔好幫襯佢嘅啫... 尋晚新聞先講零售數據下跌, 佢咁做真係因小失大囉...


是次每人消費約$163元
味道: 4 環境: 4 服務:3 衛生: 3 抵食: 1


~~~


「無所不在都市-香港 同樂日」


我呢個娛樂白痴, 剩係知道孫耀威, 官恩娜, 鄭融, G.E.M. 係乜水, 其他都唔識...



2009年6月28日 星期日

受驚過度的香港人--疫症篇

豬流感攪到大家人心惶惶, 包括我自己在內...


近期去做Gym, 除咗多咗好多人之外, 仲人人化身清潔工人, 為D器械清潔... 我更自備消毒濕紙巾, 用每一樣之前都抺呀抺呀抺呀... 每次Gym都冇半包...


地鐵同商場入面, 一有人咳或者打噴嚏, 旁邊嘅人, 散得快過速龍... 至於口罩同消毒用品啦喎... 當然一早準備好響手袋入面啦...


餐廳酒樓完全唔使Book位, 仲大把位揀... (6月尾D人又擁番晒出o黎啦)


係朋友之中, 我都算最「船頭驚鬼, 船尾驚賊」果個... 之但係... 今次竟然有人比我更甚, 我終於可以擺脫貓頭口中嘅「蛇驚(音:guei)」啦... 哦呵呵呵呵...


事源... 6月中左右, 我同大家講, 我所住嘅屋苑, 有3座有確診H1N1...
節錄小小對白比大家參酌下...


拉姑 : 好驚呀!!!


貓頭 : 近排你都係返屋企煮飯啦,XX重災區呀!(<--幾關心我)


KaKaMa : 小心為上,呢排去邊都要小心。(<--幾關心我)


龍媽 : 好彩上次冇同你地一齊飯局啫... hehe... 而家話中咗招都可以冇病徵 ka... (<--小小路人甲落井下石Feel)


拉姑 :  我早2個星期(<--我強調咗14日, 而政府都係捉人去隔離7日)響XX食晚飯, 隔離枱個美國返港阿婆咳唔停咁, 我都即刻中咗招, 第二日咳得好利害... 係貓頭死都話我唔係中招之嘛... 冇睇醫生, 都唔知道真中招定假...

無敵 : 嘩,咁呢排你唔好約人食飯啦,我地唔好應佢約!(<--大家睇下... 佢幾毒!!! 呼籲大家抵制我呀) 美國返黎果D,十個有九個都中招,你再未好的話,真係要去睇醫生啦!

拉姑 : 呢位太太, 2個星期前啦... 我咳咗1日已經冇再咳啦... 如果咳足2個星期都唔睇醫生, 死咗啦我!!! 你睇你... 小小野就試到你... 你仲要呼籲其他人唔好同我食飯Tim, 好毒呀你...


我要係呢度為自己澄清一下, 我絕對唔係一個, 妄顧其他人健康嘅人!!!


如果有留意我嘅Blog嘅人, 都可以見到, 我5月尾至6月中其間, 有接近20日冇飯局!!! 基本上已經自我隔離咗!!!


不過, 多得無敵佢呢一着, 我日後可以順利將「蛇驚」王之位推比佢啦... 嘩哈哈哈...


早2日政府話, 部分確診嘅病人都唔使捉去隔離, 我即刻放心晒, 當豬流感"流"嘅, LaLa聲打電話去旅行社, Check下D心水旅行團成咗團未先... Yeah!!!


豬流感, 使乜驚呀!!!


2009年6月26日 星期五

土司工坊 Toast Box

早幾日(2009年6月22日), 放工回家途中, 路經呢間開咗冇耐, 主打吐司同喇沙嘅餐廳...


餐廳環境幾骨子, 第一次幫襯, 試下廚師推介先...


星洲叻沙套餐(配熱薏米水)--嘩... 辣到呢... 食一啖都頂唔順... 比一向幾食得辣嘅Honey食下啦... 嘩... 連佢都頂唔順... 最慘係, 除咗辣之外, 係"完全"冇味, 同清水冇分別, 但係我唔明囉, 佢D湯係有顏色o架喎, 唔同係純色素?!!!
我初時話不如試下嗶起D辣油繼續食啦, 點知Honey話"唔好食啦, 除咗辣都完全冇味"... 就係咁... 成碗o野只係食咗4分1... 大拿拿41蚊架個餐...


小魚椰漿飯(配熱薏米水)--味道尚可... 大拿拿43蚊, 唔值... 我地兩公婆就係靠呢舊飯, 挨過咗呢一晚... (瞓教果陣個肚狂打鼓)


短期內唔會再幫襯!!!

是次每人消費約$42元
味道: 1 環境: 3 服務:1 衛生: 2 抵食: 0
###
地址 :  太古太裕路3號建安閣地下G514號舖
電話 : 2115 9985

2009年6月24日 星期三

受驚過度的香港人--外傭篇

今日(2009年6月23日)下晏落街時, 入LIFT有個太太好奇怪... 成日狂按閂門制, 又好似好急咁, 用2隻手按住條長裙...
平時LIFT度通常冇咩人, 尋日係開咗5-6次門囉, 佢個樣異常焦急...


我拎住2個大袋去回收箱, 企響門口位置, 正常就應該我出LIFT先...


點知一到地下, 佢竟然奪門而出!!!


佢衝去管理員間房, 叫管理員比佢入去...


我聽到佢講"比我入黎... 比我入黎... 我個工人呆左, 我要打電話比我老公..."


我上咗小巴, 佢都仲企係管理員間房門口, 寸步不離...


~~~


上星期一同貓兄吹開水, 佢都有相同經歷...

貓: 尋晚回程時, 有個人好大聲講野 (語氣好似同人鬧交咁)
      上層d人好緊張, 係咁轉頭望
 以平常既香港人通常都唔會有人理…
      but嗰個係賓妹, 嚇到d人死死下
拉: haha... 杯弓蛇影
貓: 我隔離既爸爸, 仲同座前面既媽媽講, 要唔要同佢掉位, 由爸爸照顧囡囡
 不過個賓妹真係好恐怖架
 直頭係大吵大鬧, 有時又喊
拉: 坐巴士都咁驚, 屋企有件賓妹咪仲驚
貓: 因為個賓妹d語氣都幾嚇人, 真係想殺人放火咁
拉: haha... 係因為我地聽唔明佢講咩啫

~~~


香港人真係可憐, 使咗錢請工人, 仲要搞到自己膽戰心驚...


其實外傭都有d好好嘅, 我識得有d人請到d 18做到24, 好乖好聽話好勤力, 仲成日都笑笑口, 就算你肯比長期服務金佢, 仲加佢人工, 佢都唔再做... 因為要返鄉下結婚喎... 真係好外傭難求...


2009年6月19日 星期五

漢陽苑韓國料理 Han Yang Won Korean Restaurant

星期二(2009年6月16日)晚拉力早終於有得要開餐啦, 查實應該上個月早兄生日時食嘅, 不過要等佢考完試先有時間, 所以等到家下囉...
雖然係今晚任食, 不過大家都好攰(佢地做到得番半條人命), 冇咩胃口, 食唔到幾多...


呢間韓燒d裝修好新淨, 大部份都係卡位, 又唔太嘈, 坐得好舒服...



熱葷都有好多款, 咖哩蟹好有咖哩味!!! (wahaha... 蔡生上身)
唔明佢地點解次次都要食薑醋...
其他前菜都唔錯... 我至愛係薯仔... 仲有好耐冇食嘅鹹菜(童年回憶Her Her聲湧現)...


個人覺得最正係... 汽水(可樂/雪碧/橙汁)任飲!!! 仲係支裝!!! Good!!! 仲有豆漿, 參蜜, 菜蜜, 同其他飲品選擇...
牛仔骨同雞翼幾好味, 羊肉碎咗d但好Juicy!!! 金菇牛肉卷係我炮制之下, 簡直Ichiban!!! 咖哩魷魚都好味!!!


繼續隊熟食... 油菜同蓮藕出奇地好食... 豬頸肉都唔錯...


臨尾食埋甜品, 正!!! 記得食咖啡糕!!! 竹庶水好清甜呀!!! 紫米露都正!!!


仲有大量雪糕, 生果, 壽司, 及其他... 不能盡錄...


是次每人消費約$135元
味道: 3 環境: 3 服務:2 衛生: 2 抵食: 4
###
地址 : 佐敦彌敦道233-239號佐敦薈5樓
電話 : 2398 8802 / 2398 8803


2009年6月14日 星期日

鳳城酒家 Fung Shing Restaurant

尋晚(2009年6月12日)大家替KaKaMa賀壽... 壽星婆揀咗去鳳城... 查實之前有一次壽星婆都有帶我同貓頭去尖東分店食, 唔知佢係真係好鐘意食呢間呢? 定係已經唔記得咗我地之前食過呢? 仲全家總動員出席, 認真比面...


原本有個驚喜送比大家, 不過後來都泡湯, 哈哈... 我到而家都完全冇同任何人講過呀, 龍媽, 我係咪好守得秘密呢...


尋日因為好多原因, 我遲到咗半個鐘, 去到大家已經點好晒餸, 埋單果陣叫個職員比單又唔比, 所以d餸名我都唔係好清楚, 唯有去OpenRice抄, 唔正確嘅話唔好怪我...


坐低時, 貓頭話鑽媽有咳, 唔食得炸子雞(熱氣), OK啦, 冇所謂啦, 都唔係一定要食嘅, 見D食評多數都有叫啫... 但係而家一路寫Blog一路發覺唔對路... D蝦多士同炸粉果咪仲熱氣, 咁又叫?!!!


乳豬生腸 -- 乳豬放耐咗都仲好脆, 味道都唔錯... 貓頭話全餐生腸最好食, 我冇食到, 都好有興趣想知係咪真係咁好食...


蝦多士 -- 一句講晒, 油淋淋!!! 咬咗一啖, 想吐番出o黎... 貓頭叫我唔好食塊麵包, 剩係食舊蝦, 太好啦, 救咗我!!!


炸粉果 -- 味道都OK, 浸咗湯感覺會冇咁油膩... 但係晚餐食粉果, 好似有d格格不入咁, 平時多數飲茶時食一盅三件, 同埋... 點解要叫1打咁多???


炸蟹拑 -- 咁大隻碟, 得2件(貓頭同鑽媽唔食), 感覺好奇怪... 味道更加怪, 難以形容, 得個大字...


炒生魚卷 -- 舊魚好鹹呀!!!!!! 我出名食得鹹, 但係佢係鹹到我想吐番出黎, Oh No...... Unbelievable(哈哈, 謎女皇上身)...  勝瓜就正常, 雲耳我唔食嘅...


呢個勁似Lunch Hour碟頭飯嘅青菜肉絲, 一個星期七日都出街食飯嘅我, 都係第一次食, 冇咩味, 又唔熱氣, 啱晒鑽媽食...


鳳城炒飯 -- 淡淡地, OK啦... Comparatively... (淡... 總比"鹹魚/油淋淋多士/怪味蟹拑"好得多)


西米焗布甸 -- 需要預訂, 味道都OK, 對我o黎講係全晚最好味嘅食物, 不過貓頭話似蛋黃味, 後尾搞清楚係蓮蓉味...


綠豆沙 -- 送嘅, 綠豆起晒沙, 但係好似冇落糖咁, 有d苦...


地方嘈到不堪, 完全聽唔到大家講o野, 講果個要嗌破喉嚨聲嘶力竭, 聽果個要傾前個身全世貫注兼讀唇都未必聽得到, 真係"鄧"鑽媽辛苦, 已經咳緊o架啦, 仲要大聲講o野...


佢地6:30pm到...
7:10pm左右, 上菜..
8:15pm左右, d職員開始發功(上甜品)趕我地走, 我地當佢冇到, 繼續傾...
9:00pm左右, d職員完全唔Refill水...
10:00pm左右, d職員直情放個大鐵盤(而家d酒樓放係推車仔上面果d膠盤)上枱, 收起晒你d碗筷, 連未食完嘅甜品照收, 明趕你走... 咁嘅招式, 真係大開眼界, 咁大個女第一次見...


咁嘅食物, 咁嘅服務, 咁嘅環境, 收我地HK$840, 簡直匪夷所思...


是次每人消費約$168元
味道: 2 環境: 2 服務:2 衛生: 2 抵食: 1
###
地址 : 旺角彌敦道749號歐亞銀行大廈1樓至2樓
電話 : 2381 5261


2009年6月10日 星期三

Milk Top 牛奶布甸 與 雪之戀 雪莓娘

上星期日Apita的Sunday Morning Market好抵呀... 北海道特選3.6牛乳 HK$22.9 喳... Milk Top 牛奶布甸 3樽 HK$45 喳... 仲有其他好多特價o野...


同我老友嘅... 都會有呢個疑問 -- "拉姑唔飲奶o架喎"... 哈哈哈哈... 你地都冇錯... 不過實在太抵, 所以忍唔住想買下, 過下鋪Shopping癮, 呢d人間極品就益下Honey啦!!! (佢都好抵得唸, 去咗翰騰閣拎定位, 等我一Shopping完就有茶飲)



今日游完水, 見到吉之島做緊台灣美食節... 又去昅下先... 嘩嘩嘩... 有雪之戀Counter呀, 上次係美食博覽一試難忘, 緊要買o黎比Honey試下味啦... (Shopping癮又起)


* 雪莓娘 * (糯米皮包入芒果味/草莓味忌廉、新鮮芒果/草莓以及海綿蛋糕 HK$15/each)



仲買咗外表勁Kawaii嘅明月冰卷之紅豆... 嘩... 個名都靚過人... HK$6/each... 好好味呀, 軟軟嘅皮, 香濃嘅紅豆餡, 食完唔想飲水, 因為成口紅豆味, 正正!!!
後面嘅係綠茶卷... HK$4/each... 好清香, 另一番滋味!!!



切開咗嘅雪莓娘...



住係呢區真係想減肥都難... 呵呵呵呵...