網頁清單

2009年3月9日 星期一

港女7宗罪

尋日係三八婦女節, 一早就搭車入元朗同阿嫲飲茶, 好眼瞓呀...


之後去咗細佬屋企坐下, 佢好熱情咁比咗D感冒茶我飲, 嘩, 飲到我溫溫隥隥, 仲加眼瞓...


夜晚返屋企同老公食晚飯, 唔覺意睇到TVB嘅「星期日檔案」, 主題係... 「港男.講女」!!! 仲一開始就提到「港女」七宗罪, 即刻要睇下自己犯咗d咩罪先...


大家有興趣可以去TVB個Web Site睇下... http://mytv.tvb.com/news/sundayreport/16697


港女七宗罪


1) 名牌奴
2) 物質主義
3) 奉旨男士付鈔
4) 擇偶條件高
5) 自拍扮可愛
6) 地獄式減肥
7) 公主病


睇完第1宗罪--名牌奴... 好放心, 因為一個減完再減再折實300蚊都唔使嘅袋, 我都可以用年幾... honey幾個月前已經叫我買過個新嘅, 我反而懶懶閒...


到第2宗罪--物質主義... 我自問都冇咩行頭, 連手錶都懶帶, 莫講話首飾... 衫褲鞋襪都唔係貴o野, 唯一係為食D, 唔知呢樣計唔計...


第3宗罪--奉旨男士付鈔... 完全冇我份... 有時去Shopping(買自己o野), 我都一馬當先自己碌卡, honey係側邊話"我送比你", 我都話"唔使"... 情人節去廸廸尼酒店住, 都係我請佢去, 佢請番我食飯, 一人負責一樣...


第4宗罪--擇偶條件高... 識得honey嘅, 都知我要求唔算高啦(除咗內在美), 哈哈... (比某人睇到之後, 實比人打死)


第5宗罪--自拍扮可愛... 冇玩過, 又冇我份...


第6宗罪--地獄式減肥... 又冇我份... 如果唔係, 就唔會係咁嘅身形啦...


第7宗罪--公主病... 亦冇我份, 不過我印象中有遇過咁嘅同事, 我都好討厭呢種人...


以上列出嘅港女七宗罪, 我一宗都冇犯, 唔通我唔係香港出世嘅???


我覺得唔係個個香港女仔都會犯呢d問題嘅, 係d低質數嘅「港男」先會咁數d「港女」嘅啫... 下一集「星期日檔案」會講「港男」, 各位需要平反嘅姊妹記得一定要睇呀!!!


2009年3月7日 星期六

碌冧法式越南料理 Nuocmam French Vietnamese Cuisine

星期三(2009年3月3日)貓兄忽然話好想好想食越南野, 仲要即刻食... 我問佢"做咩特然間急成咁呀?!"... 哈哈... 不過KaKaMa又發緊燒, 我又作緊感冒, 所以都奉陪唔到啦, 唯有推遲一日啦...


自家精制魚露 -- 我又食唔出有咩咁特別...


木瓜 牙車快 -- d網民寫到好驚喜咁... 我就覺得味道好一般, 以沙律o黎講, 份量直情過細...


越式春卷 -- OK呀...


烘蒜蓉牛油麭 -- OK呀...


越南大頭蝦 -- 真係好似龍蝦咁大隻... 不過... 唔明點解... 我地明明揀"香燒", 但係出咗o黎個效果竟然同"芝士焗"冇分別?! 有d失望...


沙爹牛串燒 -- 都OK... 牛肉一d都唔un... 醬汁仲幾好添...


魚醬炒野菜 -- 味道幾一般... 個樣仲...


菠蘿蝦糕炒飯 -- 味道方面有驚喜, 食得出有比心機炒, Good...


紐約芝士餅 -- Size細到得人驚, 開頭以為$28蚊, 真係覺得好呃枰, 之後發現特價$15, 條氣先順番d...


軟殼蟹凍檬 -- 嘩, d檬好硬呀, 都未煮透, 食一口已經feel到有好多硬物係入面... 軟殼蟹不過不失...


飲埋3杯特飲, 用埋"會濃"卡9折, 埋單$550, 全部份量勁小, 計落一d都唔平...


環境都幾嘈, 一貫旺角style...


是次每人消費約$185元
味道: 3 環境: 3 服務:3 衛生: 3 抵食: 2


###
地址 : 旺角彌敦道639號雅蘭中心1期6樓C舖
電話 : 2628 0331