網頁清單

2009年2月14日 星期六

哈魯邦again...

呢D特別日子, 最怕食指定套餐, 仲有最好唔好食西餐, 免得比人掠到一頸血...


哈魯邦就冇呢D問題, 不過都要收Min. Charge HK$500, 尚算合理, 皆因平日HK$500都未必夠埋單, 所以呢個Min. Charge一D難度都冇!!!


Book咗7:30pm, 7:00pm去到, 都拎唔到位, 話一定要等到7:30pm, 好, 等...
等到7:30pm, 我前面有Pair人冇訂位, 帶位同佢講咗話冇位o架啦, 點知個帶位行開咗, 唔知邊個又帶咗個Pair人入去, 相反我地Book咗位就冇得入, 激死我, 結果要等到8:00pm先入到去坐!!!
大家唔好以為呢D日子特別混亂, 查實佢地日日Lunch Hour都係咁混亂, 都唔明, 點解咁多年都冇改善, 坦白講, 如果佢地唔係食物質數高, D客仔比佢地趕走晒好耐啦...


. 前菜6小碟


. 石頭飯 -- 如常美味, 不過叫咗太多食物, 所以最後都食唔晒...

. 牛肋骨 -- 超級美味, 入口又Soft又Juicy, 不吃不可...

. 羊肉 -- 好大片o架, 好好味呀...

. 雜菜 -- 有冇人可以話我知, 點解雜菜會有腸仔嘅呢...

. 沙律 -- 送o架喎, 唔知跟咩送, 麻麻地...

燒呀燒... 燒呀燒... (驚喜位 -- 薯片, 表層好似平時D卡樂X咁脆, 裡面係軟綿綿, 好特別)

影張靚相留念先...


食飽有凍紅棗茶送, 好甘(苦)呀...


無鮮花, 無禮物, 但係一樣好滿足!!! Thank You!!!


潮客 Chao and Hak

尋晚(2009年2月13日)去咗北角搵食, 行下行下去到健威坊, 見到呢間酒樓打正旗號做潮州菜同客家菜, 好, 就入去試下...


冇餐牌, 得幾張散修修嘅紙, 好難先搵到有"梅菜扣肉"同"客家釀豆腐", 佢咁就夠胆話自己係客家菜... 潮州菜就得鹵味... 係好難揀嘅情況下, 唯有叫番既非客家亦非潮州嘅菜啦...


. 脆皮芝麻鹽焗雞(半隻) -- 唯一比較好食D, 芝麻好香口, 但係D皮好油...



. 石燒馬拉盞油麥菜 -- 失敗中嘅失敗, 超超超難食, 成Pan水, 完全冇味, 唔似係有下過廚嘅人所整嘅, 連我呢個Cooking Dummy都覺得自己煮都會好過佢一佰倍...



. 方魚肉碎粥 -- 無乜方魚, 就算搵到, 都好腥...



食完仲即刻肚痛, 要立即坐的士返屋企, 仲成晚都想嘔, 好辛苦... 就算送錢比我, 都唔好旨意我肯再食呀!!! 咁嘅價錢, 去王家沙食好過啦...


裝修都幾別緻, 我地坐嘅"L"型卡座只可以坐二個人, 可惜未上菜張枱已經冇晒位, 好迫呀!!!


是次每人消費約$100元
味道: 1 環境: 3 服務:2 衛生: 2 抵食: 2
###
地址 : 北角健威坊地下上層U26號舖
電話 : 2625 9918


2009年2月12日 星期四

人人都可以做公主

今晚(2009年2月12日)公司係太古城食開年飯, 食完飯走個陣見到架馬車好靚靚呀!!! 人人都可以坐上去影相o架!!! 一坐咗上去, 即刻覺得自己變咗童話故事入面嘅公主!!! Honey話等閒日夜晚, 帶部單鏡機o黎慢慢影, WoW...



西苑個"原隻鮮吉品鮑套餐"好抵呀, 6位用, $1288(另加一), 包:-
. 原煲老火湯(白果薏米豬肚湯) -- 好好飲呀, 同事L話"好似飲鹹嘅腐竹糖水", 好攪笑;
. 蠔皇五頭鮮吉品鮑(每位壹隻) -- 好彈牙呀, 仲OK大隻添呀, 我地都係為咗佢先揀o黎呢度開年o架;
. 干逼薑蔥班腩煲 -- 好好味呀, 我連皮都食埋呀, 平時我會了起晒D魚皮o架;
. 頭抽霸皇雞 -- 招牌貨, 必吃, 可以撈幾碗飯;
. 魚湯泡翡翠 -- 好好呀, 好鮮甜;
. 合時甜品 -- 有紅豆沙同合桃糊, 同樣好味;
. (16個小菜選2個) 咕嚕蝦球 -- 好大隻呀, 又爽又脆, 好正呀; 京蔥爆黑豚肉 -- 蔥多過肉, 不過都好惹味;



D份量好足, 食極都食唔晒, 而家飽到嘔... Yum Yum... 希望食完開年飯, 工作上一切順順利利!!!


2009年2月7日 星期六

小南國 Shanghai Xiao Nan Guo Cuisine

尋晚(2009年2月6日)趁honey返學, 幫拉力早攪咗餐開年飯, 又唔知要食到幾點啦喂... KeKe...


原本想去鼎泰豐, 但係一諗起冇得訂位, 仲要人齊先準入, 打沉晒...



心太軟 : 去核紅棗夾住軟綿綿嘅糯米, 好味呀, 貪佢紅噹噹, 當賀年菜食都得!!!
糖醋排骨 : 都好惹味, 甜甜的, 唔錯唔錯, 個Look都好得!!!


招牌小籠麭 : Not Bad... 但係... 都係翡翠好味D!!!


稻草肉荷葉餅 : 個樣好肥, 但係夾住個荷葉餅食又好OK喎!!!


XO醬大蝦粉絲煲 : 呢味強烈推介, 好好好味呀, D蝦又多又彈牙, D粉絲都好好味, 抵食到暈!!!


薺菜炒年糕 : 清清淡淡, 好煙un, 都唔錯!!!


豆沙如意卷 : 呢味又強烈推介, 好好好味呀, 軟綿綿, 味道配合得啱啱好, 食多幾客都得呀!!! (又係當賀年菜食, 呵呵, 好過發菜蠔屎好多啦)


迷你小湯丸 : 味道OK, 但係好似"傑"咗小小, 似飲獻汁!!!


以往好多美味嘅餐廳, 近呢一年再去已經美味不再... 但係呢間小南國絕對Keep得住水準, 食得過!!! (好多年前食過糖街嘅小南國狀元樓)


明明聽朋友講, 同客食Lunch o黎呢度一流, 貪佢夠靜又冇咩人... 之但係... 今晚係爆晒棚, 勁嘈, 傾唔到計, 喉嚨都痛埋囉!!!


是次每人消費約$200元
味道: 4 環境: 4 服務:3 衛生: 4 抵食: 4


###
地址 : 尖沙咀麼地道66號尖沙咀中心1樓
電話 : 2369 8899