網頁清單

2008年10月13日 星期一

韓國錦城飯店 Korea Kam Sing Restaurant

尋晚(2008年10月12日)10月之星想食韓燒, 暈妮而家真係唔再暈啦, 又做聯絡, 又出email, 又揀地點, 講你都唔信, 大個女啦... 何超終於第一年可以輕輕鬆鬆有得食...


何超Book咗6:30pm, 不過未夠鐘已經有一半人到咗, 但係個D阿蟬竟然好唔耐煩咁話"仲未到呀D人?!", 真係有冇咁趕呀...


未人齊, DD派住手信先, 有年頭泰國加年尾日本, 一人有成4份咁多呀, 真係多謝晒呀!!! 我去大板個陣會比心機買手信o架啦!!!


前菜--8個人比2份, 味道唔掂, 食剩好多; 牛尾菜湯--個碗似洗腳盆多D, 味似麵豉湯, 好奇怪... (另有牛尾湯冇影)



燒豬肉--大大片, 味道尚可; 燒牛肉--都幾碎, 味道尚可; 燒雞肉--OK大片, 味道尚可; 燒雞腎--原隻, 味道尚可;


鑽媽開始燒牛肉個陣, 比個阿蟬大聲喝止佢"唔好咁呀, 好難洗o架", 跟手問都冇問過我地, 就推晒D雞肉落個燒爐度, 隨即又用夾完生雞肉嘅筷子, 夾D熟豬肉落我地個碗度, 佢都痴X線, 佢識唔識咩叫衛生o架, 如果一對筷子可以夾晒2樣o野, 咁又做咩放2對筷子出o黎呀!!! 仲要冇問過我地邊個要邊個唔要, 總之用最短時間分晒去就算, 佢識唔識得咩叫尊重呀?!



蛋包魚--蛋包魚本身冇味, 但係配埋個醬汁幾好味; 炒年糕(餐牌冇嘅)--完全唔好味; 炸醬麵--怪味加好難食, 好難入口, 完全唔明點解茶煲阿四會咁鐘意食; 炒粉絲(餐牌冇嘅)--勁冇味, 又冇配料, 平時Food Court個D都好食得多呀, 結果食剩好多;



全程係冇人收碟嘅, 我地要自行疊起D吉碟, 人傳人咁移到去枱尾, 疊起咗幾棟先有人拎走...


未夠9點又催我地埋單, 送一人一片冇味嘅香口膠(綠色包裝)... D茶係港式茶餐廳比嘅茶, 並唔係麥茶...


呢度嘅廁所亦好奇怪, 用番梘, 冇梘液, 好耐冇見過...


是次每人消費約$110元
味道: 2 環境: 2 服務:1 衛生: 1 抵食: 4


###
地址 : 尖沙咀堪富利士道5號地下
電話 : 2311 8636


2008年10月4日 星期六

張公主國慶日出巡海洋公園

國慶果日我地張公主要出巡海洋公園... 嘩... D跟班嘅陣容誇張到呢... 有蘇兒爸爸推車, 蘇兒媽媽抱抱, 蘇兒姑媽撥扇同抺汗, 三個跟班仲要扭盡六壬討小公主歡心, 真係攰過自己去喪玩... 嘩, 第二日隻右手酸痛到呢, 休息咗一日都未好番...


蘇兒第一次去OceanPark, 係門口影番張相先...



小公主好想好想擁有自己嘅SunGlasses, 不過媽媽話未買得住, 唯有帶住姑媽個副頂住癮先...


食緊飯嘅時候, 小公主一路摸住杯CokeCoke一路問"咩黎?", 姑媽仲傻下傻下咁答"Panda"(個杯嘅圖案), 點知佢趁我地大家都唔為意嘅時候, 竟然大啖大啖咁吮, 飲完一次又一次, 比佢媽媽發現即刻喝止, 佢繼續問"咩黎?", 佢媽媽答"CokaCola", 佢居然博懵又再飲... 嘩, 原來已經比佢飲咗半杯啦... 唔知佢係咪熱傻咗呢... 蘇兒第一次飲Coke, 又影番張相(罪證)先...


海洋館跌膊留倩影...


兒童王國擺晒Post再影...



玩到6點先走... 跟住去銅鑼灣打冷, 食飽飽先返屋企!!!


走個陣蘇兒媽問"鐘唔鐘意姑媽呀?"... 蘇兒B答"鐘意!!!"... 蘇兒媽即刻笑住同我講"哈哈, 不仼你用咗成日時間!!!"... 哈哈, 我都係咁諗!!!


市川日本料理 Ichikawa

上星期六(2008年9月27日)honey要返學, 攪到我諗住放工返屋企做家務, 夜晚自己一個人食個飯團就算... 細佬知道咗之後, 力Sell我去佢度食飯, 可以同佢個心肝掟"蘇兒B"玩下咁話喎... 係敵唔過佢地嘅誘惑之下, 放工返屋企放低D o野就起程...


正當我係屋企執緊行李, 感動緊有個咁嘅細佬嘅時候, 貓頭嘅Call又到... 貓兄驚我得自己一個人, 話要出o黎陪我, 有個咁嘅朋友, 真係超感動...


結果... 我同貓兄同龍媽先去咗睇裝修材料, 行完之後龍媽帶咗我地去"綿綿冰"食下午茶, 貓兄同龍媽仲請客... 又要再次感動... 多謝你地呀, 嗚嗚嗚嗚...


行完街就出發去細佬屋企食住家飯... 同"蘇兒B"玩到9點幾就返屋企Lu...


"蘇兒B"雖然未夠2歳, 不過已經識唱Happy Birthday同ABC Song, 仲一連唱咗好多首英文歌比我聽... 實情有D我都唔係好識... 哈哈, 真係慚愧... 


星期日呆在家中無所事事, 所以又再跟貓兄去睇裝修材料, 睇到6點先同honey去食晚飯... 因為貪近, 所以去咗以前未裝修個陣好鐘意去嘅Ichikawa... "蝕D"Bank卡有HK$680優惠套餐, 又龍蝦又鮑魚... 睇落好似好抵...

. 珍味龍蝦蟹子沙律 -- 原來舊龍蝦得粒紅腰豆咁大, 仲以為會有半隻, 上當...
. 磯煮鮑魚什錦刺身 -- 魚生厚切, 勁新鮮, 超正...
. 火炙帆立貝手卷 -- 食個陣都冇留意到有帆立貝...
. 銀鱈西京燒 -- 一貫有水準... (以前係超水準)


. 法國鵝肝鐵板燒 -- 查實... 鵝肝我麻麻地... 片蒜蓉多士好似好油淋淋咁...
. 神戶西冷鐵板薄燒 -- 個西冷配蔥都好香口...
. 海鮮清湯 -- 同清水冇分別... 我真係唔識欣賞, 可能我未達到食家水平...
. 中華冷麵 -- 好味呀, 酸酸地, 好開胃, 好清新...


. 日本綠茶雪糕 -- 不過不失... 我鐘意佢嘅芝麻/紅豆/豆腐雪糕多D...



多謝honey...


我地都係鐘意以前多D, 而家整埋D 1234 Set Dinner, 十足快餐店咁...


是次每人消費約$375元
味道: 4 環境: 3 服務:4 衛生: 4 抵食: 3


###
地址 :   太古太古城道18號太古城中心2期2樓262 號舖
電話 : 2967 9678


2008年10月2日 星期四

花滿樓京川滬菜 Flower Trump restaurant and lounge

上個星期三破天荒做家務, 由7點幾做到11點幾, 真係做到隻手都就o黎甩骹...


跟住星期四個日Honey即刻買咗隻新電話比我吖... 500萬像素蔡司鏡頭+Xenon閃光燈+GPS... 第時出街食飯唔使再拎相機Lu... Yeah!!! 之但係粒電第一次叉要叉成12粒鐘, 所以個晚同肉酸&King佢地食飯個陣就冇得拎出黎玩Lu...



上星期五(2008年9月26日)一叉足電... 即刻出動!!! 訂位果陣我要求卡位, 都唸住未必有, 點知去到真係有, 正到暈... 趁其他人未到, 試下機先...



餐牌入面樣樣都咁吸引, 點揀好呢... 就叫4人餐啦, 樣樣都有!!!


. 玫瑰花彫醉雞 -- 買飛佛... 夠入味, 又冇話血淋淋, Good!!!


. 砂鍋雲吞雞 -- 不嬲都對呢味唔多好... 不過味道ok!!!
. 崧子魚球 -- 味道ok, 不過貓頭話食唔出係魚!!!
. 北京填鴨 -- ok有鴨味, d肉比較韌咗小小, 整體不俗!!!
. 蟹粉炒河蝦仁 -- 食唔出有蟹粉!!! 不過伴碟條啫喱魚整得好精緻!!!


. 涼伴海蜇頭 -- 冇味, 好煙韌!!!
. 蟹粉小籠包 -- 又係食唔出有蟹粉!!!
. 拔絲鴛鴦 -- OK脆!!!



環境一流, 價錢又相宜, 啱晒同老友們吹水!!!


多謝KaKaMa, 鑽媽 & 貓頭 慷慨請客!!! 鳴謝力仔提供餐廳資料!!!


是次每人消費約$160元
味道: 3 環境: 4 服務:3 衛生: 3 抵食: 4


###
地址 : 尖沙咀金馬倫道2-4A號利達行4樓
電話 : 3741 2180