網頁清單

2007年4月29日 星期日

APiTA 開咗喇

尋日(2007年4月28日)下晝係太古坊飲完茶,又未夠鐘去『志X飯局』,見有時間咪行去APiTA(前身係UNY)睇睇!

由於只係Soft Opening第二日,所以勁多人!
 


我地由3樓開始行...


3樓:淨係留番UCC Cafe(原位),全層變晒女裝(以前2樓、3樓都有),d鋪好密集,冇以前咁寛落!
2樓:化妝品keep番係呢層(除咗Clinque以前係3樓),但d Counter大咗幾倍,而家成間鋪咁大;鞋鋪全部集中係呢層(以前有d係1樓),鋪位又係大咗;UCC Cafe繼續留番原位;旅行喼都冇變!


1樓:Pokka留番原位,文具部由3樓搬咗落o黎(放係童裝隔離),男裝細咗,Kalm's 冇咗,特賣場冇變!

地庫:冇咗傢俬部,電器部細一半,多咗床褥部,其他冇變!

UNY之前講話轉名APiTA,係因為要走高檔路線,但於裝修方面真係完全感覺唔倒!

 


食飯時同志X夫婦傾開,先知佢地又係食飯前去行行,大家都覺得... d鋪頭9成同之前一樣,但價錢就貴咗... 如我所料!


今次UNY變身,比我嘅感覺係... 抄Sogo條橋,變咗商場而唔係百貨公司,只係租晒d位比人收租,而唔係自己run,對我呢講... 失去咗之前嘅吸引力!
 


消費貼士:要買貴o野的話,記得去1樓申請大新APiTA,買o野即有9折!我只買了$99蚊的煨薑粉,所以冇申請!


小插曲:買『煨薑粉』時,Promotor狂Sale我買埋冇標價錢嘅『養生梅』,又話有機,又有張A4咁大嘅Catalogue,之後問佢幾錢,佢竟然問我要乜o野年份, 唔同價錢o架o番... 2003年要$450--60粒... 哈哈,好o野,買紅酒就知要睇年份,買呢d梅都要睇年份?真係一百歲唔死都有新聞聽!
返到屋企睇下張Catalogue,列咗18個Points,只記得cancer又得,痢疾又得,發燒、感冒、中暑、胃酸多、胃酸少、血壓高、糖尿病、血糖高--乜都得,我心諗:『係呀,1人1樽放係屋企,冇人要去醫院喇!哼!』。

五樓廚房 Fusion 5th Floor Friendly's Kitchen

今晚(2007年4月28日)honey好友當主持的『志X飯局』又有新目標!(註:不是無X那個節目)
 
志X夫人之前去過兩次『五樓廚房』,覺得幾好食,環境又唔錯,咁啱佢地有個朋友返咗o黎香港,所以唸住揀間好d嘅,結果一行六人去咗呢度食囉!

佢有6道菜surprise menu,但要到佢上每一道菜時,你先會知自己有乜食,too risky,所以我地冇人揀呢樣!
 
最後我同honey都揀咗4道菜 menu,我揀咗:
頭盤:鵝肝--外脆內軟,超好味!(伴菠蘿、蘋果,清新味蕾);
湯:粟米湯--一般;
主菜:龍蝦、海鱸--幾好,配菜唔錯;
甜品:Tiramisu伴mint galeto--幾好,之前未食過mint galeto,好味!

 

honey揀咗:
頭盤:有機蘑菇沙律--幾好;
湯:都係粟米湯;
主菜:極黑豬--好正,又香又Juicy;
甜品:Cream Brulee--店員推介,幾好!




**其實甜品佢仲有Warm Chocolate Ganache(心太軟),不過因為自己做過之後已喪失興趣,所以冇揀。

**包埋一杯咖啡/茶。
好友們仲叫咗紅酒,只有我冇飲,蝕抵晒!

佳餚美酒,大家又傾得好開心,環境唔錯,啱晒聚舊。情侶的話,可選擇露天茶座,情調一流!
 
小插曲:食甜品前志X夫婦正討論見倒有位食客勁似楊采妮(入緊洗手間),志X夫人就話完全唔似,之後仲叫我跟個食客入去洗手間睇睇,見佢兩個咁有興致,我唯有照做(冇計)... 最後... 答案係... 如假包換--正版楊采妮!
是次每人消費$450元 (個人認為味道、環境、服務都好,但係唔值咁嘅價,食鮑魚抵d)
味道:4;環境:4;服務:4;衛生:4;抵食:3
###
地址: 上環文咸東街22-26號柏廷坊5樓
電話: 2854 1801

2007年4月24日 星期二

窗外的昆蟲世界

春暖花開,萬象更新,又係蟲蟲特工隊出動嘅時候...

呢排夜晚成日聽倒個窗啪啪聲,一個人嘅時候都咪話唔驚!只要夜晚一開燈,d昆蟲就好似發咗狂咁,起勢咁撞埋塊玻璃到,真係傻傻地。

平時多數都係飛蛾,不過呢排多咗甲蟲,早兩日仲有螳螂添呀!

 

不過可能成年冇抹窗,所以影出o黎有d朦查查,哈哈...


2007年4月17日 星期二

Mr. Steak -- Buffet a la minute


上次去Coffee Mrill食Tea Buffet時,無敵比咗張買一送一coupon比貓頭,我原本冇打算去(因為早場係5:30pm開始,食到7:15pm,太早,放工飛到去最快都6:15pm喇),不過星期二(2007年4月17日)下晝咁啱要去睇展覽會,睇完就閃得,所以可以同貓頭夫人一齊去大拆一餐。

食buffet之前仲去咗H&M掃貨,不過空手而回!


Mr. Steak食物真係唔錯:
牛:4種牛之中我最鐘意薄燒和牛,啱我口味;
沙律:新鮮又多選擇;
頭盆:精緻又罕見;
壽司:飯細肉大,可以食多幾件;
刺身:即叫即切;
全部都好正,甜品就一半一半喇。


由於時間不足,早場只有1小時45分鐘,加上我們遲咗10分鐘,所以忘了吃羊排、雪糕、即叫即煮麵檔!

埋單只需$288+$29+$29 (免費嗰位仍要付加一服裝費),每人只需$173,抵到爛!


食完buffet飽過龍,係Sogo行到9:30pm,避咗場狂風暴雨,不過都係空手而回!

可能d袋(又單鏡機,又贈品,又catalogue,又大雨傘)太重,回家後腰骨勁痛!

** 特別鳴謝:無敵 **

2007年4月11日 星期三

磨坊咖啡室 Coffee Mill



呢個復活節假期真係冇時停,行山、食薑醋、拜山、、、日日都忙個不停,真係好需要享用一個休閒下午茶作Ending,咁啱第四晚一班飯局鐵腳又約我食Tea Buffet,我又點會放過呢個機會呢,今次更難得有“無敵”加入,好不熱鬧!大家用了幾個鐘頭在Internet搜尋,最後選了“磨坊咖啡室”,只因大家都未去過,價錢又相宜,亦都好眼瞓(搜尋至深夜)。

復活節假期最後一日(2007年4月9日),3點正到達港威酒店,鑽鑽已在lobby大覺瞓,鑽爸見我一到便離開(開工--趕往交易)。未到3:15pm餐廳完全唔比人入去坐,要係外面等,一到3:15pm突然齊晒人,奇!

餐廳不太大,buffet枱不是太少,食物選擇又不是太少,但食物質素就真係“麻麻哋”得好緊要!


雪糕:雖然係movenpick,有綠茶同薄荷朱古力,但完全冇toppings,淨雪糕--奇!

甜品:有wasabi蛋糕,但冇興趣試!雖然唔難食,但冇一樣想再食second round,對於一個甜品狂嚟講--奇!

沙律:只有生菜、芝士碎、麵包粒及一千零一款沙律醬(類似BB醬),冇千島醬或義大利醋--奇!
另外仲有菓汁、咖啡/茶、什菓涼粉、西式酥餅、生菓、白菓腐竹糖水、中式點心、雞亦、腸仔、諸如此類。



評分:1粒星!若冇乜地方去,又想揾個地方坐下、傾下歇,都無妨,起碼我地五個女人傾到唔知時間呀!不過... 九龍香格里拉有海景... 好似正d喎!

哈... 有時食神都會入錯鋪頭嘅!

 

食飽飽,KaKaMa閃先(趕回家見她的心肝椗),我地仲同鑽鑽去反斗城玩咗陣,最後3位姨姨當然唔夠鑽鑽咁好耐力,要自己閃先喇!

###

地址: 尖沙咀廣東道海港道香港馬可孛羅酒店B1
電話: 2113-0888

2007年4月6日 星期五

觀松鼠之行



復活節假期嘅第一日(2007年4月5日,清明節),我同honey見幾清涼(得16度),雖然天陰陰,但係都去咗行山。

3:30pm先由鰂魚涌街市出發,去到紅屋循例坐低飲吓水,坐坐吓聽/見到(對到正嗰棵)樹上面d樹枝搖晃得好利害,一般雀仔係冇咁大嘅搖晃度同埋聲音嘅,當我眼定定咁睇咗陣,見到有隻動物係一條樹枝跳到另一條樹枝,再睇睇見到有條毛毛尾,直覺話比我聽呢隻係“松鼠(squirrel)”呢嘅(因為幾年前見過一次),我即刻壓低聲線同honey講:『松鼠呀!』,honey問係邊,我指比佢睇,佢見到之後叫我攞相機比佢,我真係比佢激死--出門口時問佢帶唔帶相機但佢話唔帶,到攞手機出嚟影時隻松鼠已經走咗!

當時有位郊野公園管理員在埸,佢都落車搭訕,佢話佢坐咗係度45分鐘(泊咗架郊野公園管理車係紅屋觀鳥)先見倒2隻松鼠,我坐咗1分鐘就睇倒真係好彩!跟住佢話係“鍋輪POSE”(都唔知係乜)嗰度先最多松鼠,大家再講下雀,然後就同佢講ByeBye繼續行山。

行行下去到一個亭,嗰度貼咗d通告嘅,我估佢指嘅“鍋輪POSE”可能係呢度。跟住又聽/見到d樹枝搖晃得好利害,睇多陣,見到另一隻松鼠係d樹上面跳嚟跳去,今次可以睇耐d,睇睇下見多隻細d嘅同大嗰隻一齊玩,情況就好似阿媽接細路放學,大家鬥快跑番屋企咁。今日真係大收穫!

我唸係因為今日天陰陰,人流少,所以先見倒咁多隻松鼠,實在太好了!

2007年4月5日 星期四

富臨漁港(香港仔)

上星期日(2007年4月1日,愚人節)去咗香港仔富臨漁港飲IC的滿月酒,原本冇乜特別,但係嗰間酒樓嘅服務質素真係前所未見,高潮迭起,所以想係度同大家分享下我哋嘅奇妙經歷!
 

TO IC:請不要介意,這絕對不是投訴,而係嗰晚實在太“妙”喇,所以先想同大家分享下咁啫...

奇人奇事(1)--麻雀:
由於7點已經到達,而又未知坐邊張枱,所以諗住坐係麻雀枱唔使企咁耐!得3個人點打呀?咪係打3人麻雀囉,難唔倒我哋嘅!後尾IC介紹舊同事比我哋識,順便加入我哋嘅戰團。第一鋪鑽媽發現得16楝,何超即時指住我話:『實係拉姑多咗喇,楝牌咁長』,後尾我數過冇多,其他人再數都冇多,都大家以為走咗花時,鑽媽又發現有花,最後大家一致决定換隔籬枱副牌,呵呵呵呵... 換咗副牌之後先發覺... 之前副牌除咗唔見咗4隻之外,仲冇骰,亦冇東南西北o架!


奇人奇事(2)--換碟:
食完白灼蝦,循例換碟,但係個侍應竟然放低成叠碟,仲要我地遞自己隻碟比佢,仲要自己係叠碟度攞碟,都算喇,仲要隻隻碟都好似冇洗過咁,第一隻有蝦殼,第二隻有生菜,唉!仲一d歉意都冇,好似好理所當然咁,唉唉!


奇人奇事(3)--蟹拑:
食炸蟹拑之前,侍應竟然收走用嚟點蟹拑嘅甜酸醬,全枱即時有反應話佢做乜收咗嗰醬,可能佢(已轉身離開)係失聰嘅,所以冇理我哋!後來蟹拑嚟時,問佢攞醬佢又唔理我哋,叫部長攞醬又攞碟紅醋嚟,我哋唔肯就範佢先叫人去攞碟甜酸醬嚟,結果等到其他枱都上晒下一道菜,侍應先攞碟甜酸醬嚟,唉唉唉!


奇人奇事(4)--蟹拑:
大家都未食完蟹拑,侍應又急於上下一道菜,何超隻蟹拑食咗半隻(當時佢係用2隻手指攞住隻拑),侍應就收走佢d碗碟,攪到何超攞住隻蟹拑都唔知點算,好尷尬,同枱嘅人都睇唔過眼,議論紛紛,何超唯有係冇碗碟嘅情況下,繼續食埋剩番嗰半隻蟹拑喇!唉唉唉唉!


奇人奇事(5)--雪碧:
到差不多尾聲時,侍應又出奇招喇!話說何超係飲緊芬達橙汁嘅,而另一位小姐係飲緊熱水嘅,個侍應竟然問佢地:『係咪飲緊雪碧?』,兩位當事人緊係答:『唔係』喇,個侍應攞住罐雪碧話:『呢隻好飲』,兩位當事人答:『唔要』,但個侍應竟然繼續放低“成罐未開過”嘅雪碧,o係兩位當事人嘅杯側邊(一人一罐),然後就走咗!飲緊熱水嗰位小姐都唔知發生緊乜嘢事,其他人答佢:『佢話呢隻好飲,介紹比你飲喎!』,飲緊熱水嗰位小姐比嗰侍應激到半死,反晒眼咁話:『唔該晒佢喎』。唉唉唉唉唉!
 

奇人奇事(6)--影相:
呢單唔關酒樓事!係我哋未同BB影相就坐咗落麻雀枱,跟住我先醒起,但鑽媽話只有長輩及親人先會同BB影相,在坐得鑽媽一個擺過滿月酒,所以佢係呢方嘅說話多少都有d權威性,攪到我唔好意思走去影... 最後都冇去影... 好無奈,帶晒相機,之前仲特登义足電o架嘛!唉!

懵人懵事:
是夜要11點幾先散席,散席後我哋係香港仔中心巴士站分道揚鑣,何超搭巴士去銅鑼灣、鑽媽搭巴士去中環、我搭小巴去鰂魚涌。架小巴係數碼港開出,等咗陣見有時間咪睇下幾多分鐘一班車囉,點知越睇越唔對路,原來數碼港嘅尾班車係10:30pm開出o架!Oh No... 即刻跑番轉頭跟何超搭巴士去銅鑼灣,但係佢已經上車坐低咗,架車仲開緊走喇,佢見我唔知乜事,大家用身體語言溝通咗幾下,架巴士就走咗喇!唉!唯有等下一架巴士喇!
 

真係冇諗過滿月酒要咁夜先散水!飲開嗰d都係7點幾8點就開始,9點就一定散水,所以之前冇check清楚尾班車時間囉!