網頁清單

2006年9月24日 星期日

Blueberry Delight 藍草莓夾心蛋糕@Friandise Cooking Studio




尋日(2006年9月23日)下午同K仔一齊去尖沙咀學整蛋糕,我係第三次學,而佢係第一次,唔計中學家政班嗰D!


整得蛋糕,就緊係有人生日喇!K仔係整嚟送比阿Bell嘅,好sweet呀!而我就係為興趣同消遣,不過見奶奶大人仲有10日左右就牛一,兼且夜晚都要返去食飯,到時個蛋糕都唔知收去邊,所以我就嚟一招【借花獻佛】,同奶奶大人佢講:『阿媽,我整咗個蛋糕,預祝你生日!』。呵呵!我都覺得自己好奸!


由於K仔第一次學,所以顯得比較休心。我就懶懶閑。


一開始上堂,發現大半班都係熟客仔,只有三個生客仔,Miss就將我地三個編到最出嘅門口位。開頭唔覺有乜問題,但到取材料時次次包尾,搞到人地做完晒,我地先開始,跟住Miss即刻話我地:【做得咁慢,冇時間剩o架喇,要攞去焗/雪o架喇!】,我就知領嘢。


重有其他問題,如:

1) 我去其他地方學,都有助教負責派發材料,唔使搶;

2) 我去其他地方學,都有助教負責清理枱面,呢到冇,成日要我地掉垃圾及抹枱,個垃圾筒同Sink盆係Miss後面,一來一回用晒D時間;

3) 最衰嘅係,我去其他地方學,所有器材都有齊咁多套,唔使share,但呢到只有4把切餅刀要十個人分,當然,我同K仔又係到最係先輪到啦,結果緊係又比Miss話慢啦!

4)地方更是狹窄到不得了!小小的地方,頂多只適宜10人學習,但呢到竟擠咗20人以上(其他是麵包學員),離譜!

5)最令人不安嘅係,之前去付款時,我付現金,職員A竟然話:【冇收據,有冇問題?】,我學I小姐伸長條頸答:【緊係好有問題!】,職員A依然唔想比收據,又話之後會有email confirmation話收咗我地錢,但我堅持要收據,職員A先同職員B講:【喂,要開收據呀!】,跟住職員B好唔願意咁開張收據都開咗幾分鐘!之後,我地當然收唔到所謂嘅email confirmation喇!好彩我當時堅持喳!

6)仲要我地做完每一個步驟,都會問Miss O唔OK同下一步點,佢答完OK/講完下個步驟,轉頭又鬧,『唔OK』,『做乜咁做』,等等。呢個Miss:唔合格,精神分烈咁!


最後個蛋糕D味道都不過不失,個外表就差D(因為失咗手之後,要補飛)!奶奶大人都好開心,唔等其他人返齊就話食蛋糕先,仲換過件衫先切蛋糕同影相,算我冇行錯呢步棋喇!

2 則留言:

  1. 我本以為做蛋糕好Relax,好休閒,可能揀o左過太複雜的花款,比較吃力,同瑜伽一樣都係o甘緊張(都唔明) 不過完成後又幾有滿足感!今次都算挑戰自己,冇計啦為搏紅顏一笑,有同我上過家政堂就知我呢方面有幾精(鑽媽實知,佢都比我外表欺騙過),今次實在係一個難忘經驗,多謝拉姑不時在旁提醒,唔係都幾難完成Lu!

    回覆刪除
  2. 我剩係試過一次去油麻地個間學過兩堂咋! 個次都係要自己執野, 不過就唔洗 share 工具啦、除第一輪的材料是一早放齊係抬面外, 其餘都要排除輪候的, 若然遇到個批客全部都係要搶第一的, 我地就會好似你地, 成日包尾啦, 不過幸好個阿 sir 教得好好,  好 nice , 仲主動教我地整朱古力 (係未包括在教材內架) , 後期睇雜誌時見到, 原來呢個阿 sir 好多 fan 架, 咪睇佢係油麻地鋪仔細細咁, 原來佢好受人歡迎, 除左教 cake 仲有教整好多野架。 個次我給自己四粒星 (哈..五粒星為滿分啊! ) 不錯的感覺! 很捧的! 下次就到時間, 有機會一起去吧, 我都想再學啊!! 因為做完後會好有滿足感的。    

    回覆刪除