網頁清單

2006年9月29日 星期五

冰皮月餅

今晚放工(2006年9月29日)去咗灣仔Twins到,買咗d材料整冰皮月餅,第一次整,唔知會整成點呢?!呵呵、、、白老鼠先生現在可開始擔心了吧、、、


完成後,我會將混亂情況上載,給大家開懷大笑一番!

而家,先向大家講講所需材料及製作方法吧:-


2006年9月24日 星期日

Blueberry Delight 藍草莓夾心蛋糕@Friandise Cooking Studio




尋日(2006年9月23日)下午同K仔一齊去尖沙咀學整蛋糕,我係第三次學,而佢係第一次,唔計中學家政班嗰D!


整得蛋糕,就緊係有人生日喇!K仔係整嚟送比阿Bell嘅,好sweet呀!而我就係為興趣同消遣,不過見奶奶大人仲有10日左右就牛一,兼且夜晚都要返去食飯,到時個蛋糕都唔知收去邊,所以我就嚟一招【借花獻佛】,同奶奶大人佢講:『阿媽,我整咗個蛋糕,預祝你生日!』。呵呵!我都覺得自己好奸!


由於K仔第一次學,所以顯得比較休心。我就懶懶閑。


一開始上堂,發現大半班都係熟客仔,只有三個生客仔,Miss就將我地三個編到最出嘅門口位。開頭唔覺有乜問題,但到取材料時次次包尾,搞到人地做完晒,我地先開始,跟住Miss即刻話我地:【做得咁慢,冇時間剩o架喇,要攞去焗/雪o架喇!】,我就知領嘢。


重有其他問題,如:

1) 我去其他地方學,都有助教負責派發材料,唔使搶;

2) 我去其他地方學,都有助教負責清理枱面,呢到冇,成日要我地掉垃圾及抹枱,個垃圾筒同Sink盆係Miss後面,一來一回用晒D時間;

3) 最衰嘅係,我去其他地方學,所有器材都有齊咁多套,唔使share,但呢到只有4把切餅刀要十個人分,當然,我同K仔又係到最係先輪到啦,結果緊係又比Miss話慢啦!

4)地方更是狹窄到不得了!小小的地方,頂多只適宜10人學習,但呢到竟擠咗20人以上(其他是麵包學員),離譜!

5)最令人不安嘅係,之前去付款時,我付現金,職員A竟然話:【冇收據,有冇問題?】,我學I小姐伸長條頸答:【緊係好有問題!】,職員A依然唔想比收據,又話之後會有email confirmation話收咗我地錢,但我堅持要收據,職員A先同職員B講:【喂,要開收據呀!】,跟住職員B好唔願意咁開張收據都開咗幾分鐘!之後,我地當然收唔到所謂嘅email confirmation喇!好彩我當時堅持喳!

6)仲要我地做完每一個步驟,都會問Miss O唔OK同下一步點,佢答完OK/講完下個步驟,轉頭又鬧,『唔OK』,『做乜咁做』,等等。呢個Miss:唔合格,精神分烈咁!


最後個蛋糕D味道都不過不失,個外表就差D(因為失咗手之後,要補飛)!奶奶大人都好開心,唔等其他人返齊就話食蛋糕先,仲換過件衫先切蛋糕同影相,算我冇行錯呢步棋喇!

2006年9月19日 星期二

松屋串燒專門店 Matsu Ya Japanese Restaurant





昨晚(2006年9月19日)各位好姊妹為小妹及鑽石賀牛一,一行九人去咗松屋勁擦放題,由於同事的相公說好吃,所以才選中這一間。可能期望過高,結果嚴重失望!

一句講晒:-

1) 味道:難食質數差! (魚生:腥;燒蝦:臭;贈品:燒牛柳粒勁"鞋"勁"乾"兼冇味,及銀雪魚一般;甜品:只有3種雪糕,但冇得任食;實在太多食物唔掂,不能盡錄)

2) 環境:差!茶餐廳質數!(坐係出菜位,對住多士爐、水吧、洗碗盆等,very dirty)!

3) 價錢:唔平(每位折實$200),但order紙的選擇項目少嘢到唔敢相信!

4) 服務:茶餐廳待應質數!炸生蠔和芝麻雞翼:入座即刻order,到走先嚟,離譜!

評分:劣劣劣劣劣!

都怪我信錯人,難為咗鑽石同埋班好姊妹,Sorry!!!

返到屋企仲即刻肚疴,惡夢一場!

地址: 金鐘夏愨道12號美國銀行大廈地下7A號舖
電話: 2136-1271/ 2136-1272

外傳(1):呢輪好奇怪,個個食飯都嚟公司等我,今次係猫頭夫人同小龍媽(係地鐵站)接我放工,勁冧!!!

外傳(2):食晚飯前,一行六人去咗Crabtree掃貨,大家發狂喪買,埋單成為$4xxx,折實都要$3xxx,勁喪!!!(不過早幾個月,只得我同猫頭夫人兩個人去,都係埋單成為$4xxx,折實都要$3xxx,攞到我"隻積"咁!)

2006年9月17日 星期日

迎接中秋節


嘻嘻!今日(2006年9月16日)食晏前路過文具鋪,見倒Keroro軍曹嘅燈籠,好得意,忍唔住買咗!承為19蚊!

返到屋企忍唔住要即刻掛出嚟!呵呵!

仲未夠喉!再係柜桶底揾埋舊年隻玉桂狗燈籠出嚟!呵呵!擺咗成年,都仲係咁得意!

好!搞掂晒!正式開始迎月!


2006年9月4日 星期一

哈魯邦韓國料理 Harubang Korean Restaurant


今晚(2006年9月4日)同舊同學"黄毛仔"做生日,佢四點幾放工打比我,我問佢想去邊度食,佢竟然叫我唸,Oh my god!最surprise嘅係佢竟然主動話可以過海,我緊係"吐"飯應。更神奇嘅係佢竟然仲話不如去我公司附近食,邊有咁大隻蛤蚧隨街跳?!我受唔住誘惑,唸都唔唸就答「好,不如你接埋我放工!」,佢竟然答「好」(It's Impossible)。結果我係公司"印印"腳等佢接我放工,點知,佢去錯隔幾條街嗰間McDonald,又要行番幾條街過嚟,大熱天時,真係辛苦咗佢!Sorry吓!

參觀完我公司,問佢鐘唔鐘意食韓國嘢,佢答「吓!又話食越南嘢!」(嘻嘻,佢搭車嗰陣我已經改變主意)。我同佢講:「同得你食飯,緊係要食d好嘢!」(因為間越南嘢好食但環境唔好)。佢答「韓國嘢,鐘意,你唔記得讀書嗰陣,我哋個個禮拜都去食韓國嘢嘅咩?」,我真係唔知點答佢,因為一時間記唔起已經係十三、四年前嘅事。又要講多聲Sorry!

落到大堂,提起IN小姐買豪宅嘅事,先知黄毛都有睇我嗰blog,又一surprise!不過佢選擇做一個沉默的讀者(淨睇唔回應)。

行咗幾分鐘,去到太古城嘅「哈魯邦韓國料理 Harubang Korean Restaurant」,又係即刻有位(因為都幾貴,所以比較少人)。今次竟然有Set Dinner,之前食過兩次都冇o架!
叫咗D餐(2-3人用),HK$580,有烤肉拼盤(HK$500),海鮮石頭飯(HK$130),6小碟涼伴菜,蘿蔔湯,生菓,免加一,韓國茶任飲。

叫Set真係抵好多!如果唔係,散叫埋單真係要HK$800!

食咗三粒半鐘,天南地北,無所不談。最利害係,兩位小女子竟然成個餐食晒依然面不改容,勁!主要原因係我哋兩個太鐘意食韓國燒烤,而Harubang嘅食物又太好食喇!


食完飯,我好坦白同佢講,其實我唔記得約咗佢,仲執好晒游泳裝備,唸住一放工即刻去博剎!不過,請佢食咗餐好嘅,佢當然冇怪我喇!(哈哈!老人家冇記牲!請勿見怪!)

服務、環境、食物:全部比4粒星!價錢:當然覺得貴咗D,不過好過冇Set仲貴!

 
地址:側魚涌太古城道20號元宮閣G402-03舖
電話:2539 6398