網頁清單

2006年12月25日 星期一

泰梳乎2006--The Sukhothai Spa




第二晚執行李執到2:30am,第三日6:30am就要起身喇!點解要咁早?因為9:00am要做spa囉,8:45am就要到spa center準備,做spa前仲要食埋早餐buffet,所以冇辦法,一定要早d起身!

我哋一星期前已用email book好The Sukhothai Spa!

泰梳乎2006--Celadon

打完波,勁肚餓,今朝d早餐buffet已消耗得一乾二淨。回程時在的士上打電話book咗位先,返到酒店上房放低d高球用品、梳洗下,隨即去餐廳食晚餐喇!

Celadon嘅外觀日夜都一流,餐廳入面,每間小屋分為一個區域,每個區域只有十張枱左右,很寧靜、優雅!

2006年12月22日 星期五

泰梳乎2006--喂!起身食早餐喇!

嘩!第二日8:30am就開始食早餐好似早咗d喎?Hey,一d都唔早o架啦!因為10:30am『泰友人』就會過嚟酒店接我哋去打Golf架啦!

其實對早餐buffet(免費嗰隻)冇乜expectation,唸住咪都係嗰d嘢,冇唸過會咁有驚喜嘅!

泰梳乎2006--和成豐魚翅

與『泰友人』會合後,我哋去咗很近酒店的Mahamek Driving Range。

我地向酒店的reception問路時,他說『附近是有個Driving Range,不過好細個o架喎!』,去到一睇,大過香港嗰d好多,又有湖又有樹叢,仲有『自動餵波機』,超正。

練完2個鐘頭波,天都黑晒,成身臭亨亨,打的返酒店沖個涼,個肚已經打晒鼓,再落china town揾食。原本我倆想去『阿一鮑魚』試下,不過『泰友人』就建議去『和成豐』,好喇,信佢一次,就去試下喇!

2006年12月20日 星期三

泰梳乎2006--Chocolate Buffet

在酒店房settle down後,剛好2pm,係時候去Lobby Salons度開餐!


據聞這個朱古力自助餐頗爆的,所以來Bangkok之前幾日已用email訂咗位,係咪好吸引呢!

全部甜品都勁好味,仲有日、西式小食枱係餐廳另一邊。

泰梳乎2006--The Sukhothai Bangkok 索可泰酒店

真係成世人第一次住這麼漂亮的『商務』酒店!住過關島的Hyatt同九州豪斯登堡(Huis Ten Bosch)的丹哈格大飯店(Hotel Den Haag),也是很漂亮的,但仍不及Sukhothai!

由酒店入口、大堂、餐廳、花園、房間,所有地方都很漂亮、很細緻,難怪會攞咁多獎喇!

一落Taxi已有專人替你取行李,check-in時每人送一束花(手繩),check-in後有專人帶你上房、入房、介紹全房設備,專人送行李上房,每日換welcome-fruit(第1日3個柑,第2日1個木瓜,第3日2個蘋果),每晚換枱頭floating-flower,每晚換床頭welcome-flower,每次返房都滿室芳香,夜晚搭taxi返去酒店入口有『食蕉』check車尾箱,可2點late check-out,只在餐廳碰過另一對香港人,可說是很少香港人,很寧靜、、、優點真係數唔晒!

酒店內
(水中花園真是浪漫極了,連續兩晚都有wedding banquet,好羨慕呵!)

2006年12月18日 星期一

泰梳乎2006--Suvarnabhumi Airport 蘇瓦納蓬機場

出發喇!


第一天(2006年12月15日),9:05am起飛,所以晨早6點起身,7點出門口,8點到機場check-in,時間全部較得啱啱好,跟住慢慢行去買吓八卦雜誌,過海關,過X-Ray,逛一逛機場內的店鋪,再慢慢行去Gate#2(超近),剩番5分鐘,唸住時間較得啱啱好,點知原來班機delay咗15分鐘,唯有去埋厠所,仲有時間剩,咁咪週圍望下囉,見到登機指示牌亂晒龍,一時係CX Bangkok,一時係AA Singapore,一時係AABangkok,究竟班機係去邊o架?

2006年12月10日 星期日

南翔饅頭店

今日(2006年12月9日)原本打算下午回家後唔再出街,但回家後收到信用卡禮品換領信,忍唔住打咗去禮品換領中心check吓有冇貨,聽到電話錄音話冇貨,再同接線生check吓幾時有貨,點知接線生話今日返咗貨,叫我隨時可以去換領禮品。

等咗咁耐,緊係“那那聲”搭車去換領中心喇!落到銅鑼灣先5:45pm,換領中心收8:00pm,唸下唸下不如食埋晚飯先去換領中心,唔使抽住隻DVD錄影機去食飯咁麻煩。

咁啱路經銅鑼灣廣場,咪不如去睇吓嗰間成日排晒長龍、冇可能入倒去食嘅嗰間小籠包有冇位囉!去到小籠包門口原來未開門,已有人排隊等候,我地唔執輸排埋一份,6:00pm,開始進場喇!第一次嚟,人生路不熟,見個二人餐幾抵食咁,就二人餐喇!


鮮肉小籠包:好味,拍得住翡翠小籠包
脆鱔:超好味,連唔食魚嘅honey都不停口咁食
炒麵:好味,正合我胃口
桂花拉糕:好味,好正,好清香


其他:不過不失

正正正正!拉姑誠意推介!

食完晚飯去到換領中心,個職員竟然話冇貨,有冇攪錯,我地2個鐘前先打電話嚟check咗有貨先搭車嚟換領中心架!

最後失落地空手而回,唉、、、呢張信用卡真係黑到庳,申請出問題、換領又出問題,唉、、、但honey話『唔緊要喇!起碼嚟到銅鑼灣叫做食咗餐好嘢喇!見你頭先個“好味樣”、、、』,吓?我頭先個樣真係咁好味咩?嘻嘻、、、

地址: 銅鑼灣廣場一期三樓305-8號舖
電話: 3690-2088

2006年12月2日 星期六

九龍灣 Red Box 火場直擊

今個星期五早上藍天白雲,天氣好到不得了!早上十一時左右,聽到一聲雷響,當時覺得很奇怪,天氣這麼好,點解會行雷?問d同事聽唔聽到行雷聲,問咗2次,冇人理我!唉!

過咗一陣,攞d文件入老細房,見到對面海Red Box出現磨菇雲之後立即大叫,其他同事即刻走晒過嚟睇埋一份,睇完眾人開始攞手機影相,叫佢地第一時間upload上YouTube,又冇人理我!唉!

之後即時通知各MSN好友,KaKaMa仲聯絡在九龍灣工作的好友E小姐,E小姐都話好恐佈、、、

01/12/2006 11:47 am

01/12/2006 11:51 am


01/12/2006 12:24 am


02/12/2006 14:56 am (第二日朝早好多帆船係海上飄下飄下)


轉載明報即時新聞:-

九龍灣地盤四級火救熄 (明報) 12月 01日 星期五 10:50PM

九龍灣企業廣場第五期地盤發生的四級火警,已在中午1時24分救熄,沒有人受傷。

九龍灣常悅道企業廣場第五期地盤今早11時38分發生火警,冒出滾滾濃煙,直沖上天,在港島區亦清楚看見濃煙。火警在上午11時45分升為三級火警,消防在11時58分升為四級火。

消防員表示,火警在17樓的平台發生,當時約有百多名工人工作,起火的是龐大冷氣機水塔的玻璃纖維,火場面積約75米乘10米。消防動用了100人及6條喉灌救,並疏散了100多人。冷氣水塔被嚴重焚毀,初步顯示事件無可疑。


2006年12月1日 星期五

La Taverna

今晚(2006年11月30日)一早約好力高同KaKaMa到尖沙咀海港城的Crabtree掃貨,因為今日開始一連四天Christmas Preview -- VIP有七折,人山人海,還有3-4個食蕉進行人流管制,排咗一陣隊先入到去,超誇張的!入到去首先執咗好友們(龍媽、無敵、同事丙等等)的order,然後才慢慢選購自己的心水貨品,今次終於比我買倒Home Fragrance Diffuser喇,等咗成年幾先至再有貨,真係太好喇,昨天及今早的不幸衰運終於遠離我了!心情輕鬆好多!今次主力買之前未買過嘅產品,包括Fragranced Botanicals,Bath & Shower Gel (Rose,Lavender,Nantucket BRIAR),Body Scrub (La Source),還有2個Christmas Gift Set!呵呵!攞到番屋企,手指變咗『羅玆威以』咁款!不過力高同KaKaMa都唔弱o架!

喪買1小時後,即閃到La Taverna 吃意大利菜為力高賀牛一,貓頭夫人還未到!手電隨即響起,貓頭夫人問我地去咗邊,我仲賴醒即答:『到咗喇!』。原來佢頭先係Crabtree門口見到我地掃貨,但係因為門口有食蕉,同埋佢要去買d嘢,所以冇叫我地。結果、、、唯有自己一個人行過嚟喇!


齊人點菜,但好多菜名睇唔明,唯有等店員推介。我地Order咗:
1) 蒜蓉包 

2) 凱撒沙律 (Caesar Salad)

3) 軟水牛芝士蕃茄香草沙律 (Buffalo mozzarella, tomato slices, & basil)
4) 燒小羊排 (Lamb Chop)

5) 三文魚義大利雲吞

6) 蜆肉意粉 cream source

7) 拿破崙 ice cream

8) 記不起是egg custard還是什麼了

 

由於美食當前,乜都唔記得晒,所以中間d食物冇影到相,呵呵呵呵、、、

Emote@CocoAtM.NeT

全部食物都好味,制作認真(不像外面那些Formula餐廳),最神奇係4件Lamb Chop可以為我地做2件5成熟、1件7成熟、1件10成熟(有1滴血我也吃不下),以前在其他餐廳從未試過,Good Good Good!






 

是次4人消費$918元,還以為要過千添,都算價錢同食物成正比。環境很古典,不錯。不過廁所就、、、很衛生,但路途比較嚇人、、、

地址: 尖沙咀亞士厘道36-38號地下
電話: 2376-1945

2006年11月27日 星期一

墨攻




由於星期六、日都落雨,唔想出街,所以尋晚(2006年11月26日)應承honey友人的邀請,一行五人去食pizza hut後再去看電影!

之前並冇留意這電影,所以食pizza時,對於他們滔滔不絕的討論,我都冇『搭傘』!

看的時候也不太投入,初頭十五分鐘還想睡呢!但回家後看國際台的Charlie's Angels反而看到不想去沖涼!

看了2個多小時,很多細節好像沒時間交待似的!與今天才看的movie web site所提的情節,好像少了很多東西似的!

有些畫面有點像『魔介』,希望不是模仿別人吧!我冇睇過『大隻佬』,聽別人說是很“玄”的!此電影亦有些“玄”的,大家自行去參透吧!

最不明白嘅係:既然墨家以守城見長的,為何戲名不是叫『墨守』呢?還有買飛為何送咖啡粉(與該電影毫無關係)而不送其他東西呢?

有我喜愛的范冰冰及吳奇隆演出,算不錯吧!

www.abattleofwits.com.hk


2006年11月19日 星期日

UBS Hong Kong Open 瑞銀香港高爾夫球公開賽

今日(2006年11月19日)係一年一度嘅大日子 -- Hong Kong Open 香港高爾夫球公開賽!

以往兩年都係星期六放工時在office總動員出發,但今年office由新界搬咗過港島區,去到都收檔喇,所以今年改咗星期日一早去。

往年免費巴士服務只係由上水火車站來回香港高爾夫球會,今年最正係新加免費巴士服務去到金鐘海富中心同九龍塘理想酒店!呵呵,就晒我!今朝一早起身,煲落湯、晒好衫,整裝出發,搭的士去到金鐘海富中心,剛好趕得切搭十點半嗰班車,Yeah、、、舒舒服服大約45分鐘便到,正。

去到第一時間揾熟人so so下先,跟住去pro shop掃下貨,嘻嘻,買咗2對鞋、2頂帽、一件長T,嘩,真係大出血!跟住即刻去info ctr攞埋d贈品,攞咗4頂帽、4條証件繩同4個環保袋,叫做有d收獲!

然後先去1号洞睇開波。12:15pm,Match#29,西班牙嘅Alejandro CANIZARES同中國嘅Zhang Lian Wei,由1号洞跟到去6号洞,已經1:30pm,鬼咁餓,見有小食亭,都唔理得咁多喇,買2隻熱狗喪隊先。原本仲想買多1隻蕉同朱古力蛋糕添呀,不過最後冇買。食完都跟唔切原來嗰隊,唯有等下一隊嚟啦。第7号洞到18号洞就跟Match#30,印度嘅Jeev Milkha SINGH同Jyoti RANDHAWA,最後佢地兩個同時win 3rd place!

我係第一次由第一個洞睇到第十八個洞,好開心,亦都好倦!

睇完大約4:30pm左右,又要趕去搭免費巴士返金鐘囉!拜拜!



小插曲:影相時因為唔記得熄閃光燈,結果比d職員鬧,好慘!我唔係冇熄,而係原來個相機熄咗再開會冇咗之前d setting,變番auto閃光燈喳!嗚嗚嗚嗚、、、

2006年11月17日 星期五

Brasserie Le Fauchon

昨晚(2006年11月16日)由於KaKa媽要為貓頭夫人及力哥賀壽,所以大家約咗出嚟食飯,地點由力哥揀,由於力哥好想食鵝肝,所以佢揀咗食法國菜。

力哥 -- 上次你第二次話要食鵝肝但又放咗飛機,我已千叮萬囑不要再吃鵝肝了,結果、、、
鵝肝其實唔吉利我倆!已經係第三次喇!係第三次力哥你好想食鵝肝,跟住又放咗飛機!
我不是怪你,只係希望你信下邪!

返翻正題!

晚餐有三道菜($188)及四道菜($208)選擇,包tea/coffee,法包(跟牛油)任吃。我地三個都揀咗3 courses,唔要湯!我的選擇係:-

頭盤:  凱撒沙律 伴 香煎大蝦 (OK,d蝦煎幾好食)
主菜: 香煎海鰽魚 伴 什菌意大利燴飯 (OK,不過不失)
甜品: 朱古力心太軟 (失望,朱古力唔香,又焗得唔夠,唔合格)

真係SOHO區都唔一定好吃(註:不難吃唔等於好吃)!但氣氛同裝修都OK,同另一半唸唔到食乜時都可以一試!

同場加映:隔離枱兩男三女,男左女右;三女悉心打扮,放晒電;兩男落力表現電話搶火,又表現魔術,笑吟吟;正所謂姣婆遇着脂粉客,好嘔心,Waiter,『那那聲』埋單呀唔該!

地址: 中環蘇豪伊利近街45號地下
電話: 2526-8318


2006年11月10日 星期五

麻布茶房 Azabusabo

今晚(2006年11月9日)係【十一月之星聚餐】嘅大日子,大家去咗尖沙咀『南山谷韓國居食屋』賀一賀佢。哈哈、、、但係我唔打算係度向大家報導!點解?事原係、、、

七點半左右齊人,由於大家都勁餓,所以“拿拿聲”order食物,而d食物一到,就好似跌咗落充滿食人魚嘅河入面咁,“渣一聲”冇晒!食咗三、四輪之後,到我醒起要影相寫blog時,都冇乜好影喇!所以、、、算吧喇、、、

原本一早食完可以鬆人,大家都笑住話『唔慣咁早食完返屋企』,但係尋日有三個墟咁多,傾吓傾吓,已經十點,大家喺充滿歡樂嘅氣氛下離開!

行到樓下,路過上樓前發現嘅甜品店,大家行個注目禮,其中五人(無敵、貓頭夫人、高瘦平、龍媽、同埋我)被一股“神秘力量”吸咗入去!呀呀呀呀、、、

坐定後睇睇個menu,嘩嘩嘩,個menu入面樣都咁吸引,好難決擇呀!

最後我order咗“草莓白肉霜蜜豆沙”(左圖),龍媽同無敵就order咗“芒果聖代”(右下圖),貓頭夫人同高瘦平就order咗“枺茶杏仁豆腐芭菲”(右上圖)。

人地幾個人share一個,我地就一人order一個,呵呵呵呵、、、食物一到,大家瘋狂影相一輪,影到d軟雪糕都溶到滴落地,“拿拿聲”食喇!一路食一路逐樣材料研究,話題不絕,食得好開心,最後結論係我order嘅“草莓白肉霜蜜豆沙”最抵,因為材料同分量都係最多!正正正正正!

回家途中,充滿愉快的感覺,所有唔開心嘅事都忘記晒,太棒了!


地址: 尖沙咀彌敦道132號美麗華商場2樓諾士佛階12號
電話: 2377 3780

2006年11月5日 星期日

瘋狂的週末

Date: November 5, 2006 (Sunday)


今個星期真的超誇張,星期二游完水,星期三學完瑜伽,昨天星期六仲同班同事去打波,咁都仲未夠?今日做完成朝家務,下晏仲去行山,真係人都癲!
Emote@CocoAtM.NeT

游水:唔係普通浸吓,而係唔停咁游半小時!

瑜伽:唔係普通玩吓,而係地獄訓綀兩小時!仲整傷咗背肌添!

打波:唔係普通打吓,而係鐵人耐力賽!打個半鐘壁球,兩個鐘桌球,個半鐘羽毛球!唔好以為輪流打波會有時間休息下,唔使打波個陣又要應付NDS對戰,死未!




家務:收衫摺衫、洗3機衫、掠4機衫、吸塵、拖地、搗垃圾、換床單、換隔塵網(冷氣機)、吸花槽蜘蛛網、維修柜門、攞完d床單去洗仲要還碟,三點幾先有得食lunch!真係暈得一陣陣!
行山:上山用咗個半鐘,落山用咗45分鐘!行到太陽都落山,哈哈哈、、、




埋單--行咗超過一萬步!剛好符合醫生『日行一萬步』的呼籲!



外傳:尋日苦戰完,今朝理應瞓到中午先起身架!但係八點半都未夠,已經被噪醒,原來係直升機,仲要不停徘徊超過半小時,之後瞓都瞓唔番!唉!倦死人咩!



2006年10月28日 星期六

壽司廣 Sushi Hiro

星期二晚(2006年10月24日)要同貓頭夫人、KaKa媽開旅遊大會,順道開大餐。貓頭夫人中午時比咗幾間餐廳比我地揀,最後大家揀咗壽司廣,雖然貴d,但KaKa媽出得嚟食飯,咪揀間好d囉,試吓新嘢嘛!

一坐低,侍應生就幫我哋斟酒--桃酒梳打!(當我見佢斟d清澈透明的液體時,我好緊張咁問佢:『呢d咩嘢呢o架?』『吓!桃酒!我唔飲得酒個噃!』個侍應生冇理我,繼續斟)
原來貓頭夫人同我都因為皮膚敏感,所以唔飲得酒,最後KaKa媽一陣就乾晒成杯,貓頭夫人飲飲下都飲晒,而我只咶了一下,都幾好味!

跟住就放低兩碟前菜!

我哋經一輪商議後,order咗兩個$450套餐,再加菊花蟹肉,同埋三文魚沙律手卷(1.5份,係侍應生建議的)!

當每樣食物一上枱, 三位Blogger即瘋狂用手機拍照(我第一次用Nokia N80影相,所以全部OutFocus),瘋狂程度令到隔籬枱一男一女也為之側目!拍完照才慢慢開始品嚐!

蟹肉充滿海水味,好鮮!醋味水雲好開胃!握壽司好味!三文魚沙律手卷乾咗d!煮物好味!麵豉湯好濃,好味!天婦羅好好味!桃味雪芭好味,略甜!

食食下,侍應生話d嘢嚟晒,叫我哋加單,咁我哋咪叫佢比個餐牌睇睇囉!睇完餐牌,先發現好多食物都未嚟,個侍應生check完後話我哋order咗兩個$320套餐,d嘢嚟晒啦!唉!原來係個侍應生落錯單!

埋單承為$1056!唔係個侍應生落錯單,埋單應該要$1342!走嗰陣,我要攞單返屋企寫Blog,貓頭夫人同KaKa媽先驚醒點解我次次寫Blog可以咁好記性,記得晒d菜名。呵呵呵呵、、、


由於美食當前,乜都唔記得晒,所以埋單後先發覺冇開旅遊大會。經一輪商議後,我哋決定去糖朝食糖水,順便開埋個會!不過去到糖朝又發現好嘈,行咗幾條街,最後去咗許留山落腳,順利完成會議!


睇吓,餐牌勁可愛,看圖識字,一目了然!


味道: 4 環境: 5 服務: 4 衛生: 5 抵食: 4

地址: 尖沙咀廣東道100號彩星集團大廈7樓
電話: 2377 9877

2006年10月26日 星期四

數碼港 一日遊

上星期日(2006年10月22日)honey說我未到過數碼港(Cyberport),所以要帶我去走走看。

飲完茶,下午二時正,在鰂魚涌地鐵站B出口乘三十分鐘小巴便到達。

未到達之前,以為是遠離鬧市很遠的,原來只是與香港仔市集距離數分鐘車程!
又以為好似迪士尼咁自成一角,原來只是係d舊樓前面一條街起d新樓,規模宏大只及屯門黃金海岸!
超級豪宅除獨立屋外,其他樓貼樓,真係豪得特別!

數碼港大約可分為商場、酒店、辨公大樓及住宅四大項。
商場:面積不大,比荃灣千色店還細;店鋪數量不多,大半空置。
酒店:細,比荃灣Panda Hotel還細。
辨公大樓:少量科技公司,18個月免租期後,租户紛紛撤離。師奶路過時說:『辨公大樓使唔使咁luxury呀?話晒係用納稅人嘅錢吖!』,我絕對同意!
住宅:有獨立屋,有高樓大廈,全海景,佔數碼港總面積超過50%!

記憶中,數碼港係要嚟幫助科技發展,眼前的景像,只教IT人對香港政府心死!

所以我一向的計劃是對的,就是遲工、環遊世界、使晒d錢返嚟攞綜援、免費住公屋,哈哈,攞番我之前比咗嗰d!

好!睇埋實地情況先!

辨公大樓分四期,第四期兩層高,全吉,像海邊大屋。其餘三期同酒店用平台公園連埋一齊。



商場因為人流低,所以裝修仲幾新淨,但女厠就、、、嘔、、、



住宅似足屯門黃金海岸,花園比成個數碼港d人用,好似細咗d、、、


各位姊妹睇完呢篇報導之後,都應該唔會好似我咁儍,浪費半日時開在這個地方吧!

2006年10月23日 星期一

九龍萬麗酒店 碧翠咖啡閣(Patio) 自助晚餐

上星期四(2006年10月19日)同成班姊妹去咗九龍萬麗酒店-碧翠咖啡閣(Patio)食國際、中西日自助晚餐,為十月之星賀牛一!


選得呢間,梗係多著數喇:-
Emote@CocoAtM.NeT

著數1:
兩位壽星公每人可免費獲贈1磅鮮果蛋糕一個帶回家,勁著數!由於需出示身份証明文件,所以大家還討論了一陣子關於新身份証的趣事。
著數2:
每人送一隻大閘蟹!大頭文同文敵開頭好認真咁討論點樣瓜分I小姐隻大閘蟹,點知原來大把人唔食,結果一人可以食2、3隻,好搞笑!最後仲食唔晒添(食剩2隻)!
著數3:
原價$278 (拆後加一)、恆生金/白金卡:7拆


食物方面:-


好多海鮮,生蠔、長腳蟹、翡翠螺、仲有其他,但我近期經常胃炎,所以我全部冇食!
刺身有三文魚、立魚、八爪魚,一般!

有咖哩同印度包,原本諗住試吓,不過食食下唔記得咗!
最開心係有鐵板牛仔骨,串燒雞軟骨,串燒羊肉,燒粟米,熱辣辣,啱晒我!
沙律一般,不過不失!
餐湯只有中湯及麵豉湯,奇怪!但餐包勁多款,仲有飄零燕食嗰款,好得意o架

甜品唔算少,四款口味Haagen Dazs雪糕(綠茶、朱古力、士多啤梨、雲呢拿),最開心有朱古力噴泉,Tiramisu好味,朱古力毛士蛋糕好好味,I小姐仲無意中食咗咖啡毛士蛋糕
餐飲係自助形式,coffee & tea任飲!


取第一轉甜品埋位時,大家都嘩嘩聲(嘩!好靚呀!),龍媽好緊張咁問:『係咪要影相放上個Blog度呀?』,嘻嘻!Sorry!冇帶相機!不過好高興大家為我個Blog而緊張。
Emote@CocoAtM.NeT


我攞完甜品,大家一窩蜂出去攞甜品,跟住我攞鐵板牛仔骨埋位時,大家又嘩嘩聲(嘩!好好食咁呀!),嘻嘻!呢d咪叫『隔籬飯香』囉!


味道: 3 環境: 4 服務: 3 衛生: 4 抵食: 3


Address :   T.S.T. 梳士巴利道22號萬麗酒店4/F (新世界中心)
Tel :     2734 6690

2006年10月16日 星期一

築地 八爪魚丸

今日(2006年10月15日,午)得一條冷,唔知食乜好,醒起鄰居乜生之前說過UNY的八爪魚丸特別好食,唔知真定假!但係又醒起早幾日睇OpenRice見到全港最好味、最似日本嗰d八爪魚丸間店鋪叫『築地』!
嗶嗶嗶嗶、、、咦?UNY嗰間八爪魚丸店咪好似叫『築地』囉?唔得,要去睇睇!

因為得一條冷,所以可以無拘無束咁走去UNY八吓!早上做咗M6+Facial+大量重型家務(包括去超市及洗衣店),更加想食八爪魚丸,因為好耐冇食過!行咗15-20分鐘,終於到達,嘩,原來今日UNY會員有95折,咪好多人,死得!

行多幾部去到UNY超市入口,呀呀呀呀、、、真係『築地』呀!點解我咁遲先留意到o架!(註:都開咗幾個月o架喇!)
即刻跑去排隊,貼著玻璃見師傅將啲八爪魚丸碌嚟碌去,好肚餓呀!排到我時,唔知點解好緊張,可能因為唔知點order喇!最後照抄排前面嗰位太太嘅order,要咗「小舟套餐」,成為$28蚊(6粒$25,加$3飲抺茶) 。 有2隻醬汁選擇,再加鰹魚片、紫菜碎同蛋黃漿上去。
 
(嘻嘻!事隔一天,帶同事C嚟試下時,用手電拍下照片,圖為「小舟套餐」,成為$39蚊(10粒$34,加$5飲2杯抺茶) 。

跟住鼠咗去Food Square到食,一咬落去,wow!熱辣辣,d皮好脆,八爪魚肉大大舊又彈牙, d醬好好味,話咁快就食哂6粒八爪魚丸。再飲啖冰凍抺茶,Yummy!真係想即刻買多一盒再剎過吖!好,聽晚同honey再嚟過!Yeah!
Emote@CocoAtM.NeT

味道: 5   環境:N/A  服務: 4   衛生: 5   抵食: 4

築地 GINDACO
地址: 側魚涌太古城中心2期UNY地庫1層超巿旁
電話: 2151 0782